Këmbanat e alarmit bien te Barcelona: Flick tregon problemet fizike para sfidave me PSG-në dhe Real Madridin

Pavarësisht fitores bindëse me rezultatin 2:5 në udhëtimin ndaj Real Betisit, te Barcelona situata nuk është plotësisht e qetë, pasi kalendari rezervon dy përballje tejet të vështira brenda javës së ardhshme kundër Paris Saint-Germain dhe Real Madridit. Klubi katalanas po përballet me një valë shqetësimesh fizike në repartin e prapavijës. Gjatë sfidës së fundit, Gerard Martin u detyrua të lërë fushën, ndërsa vendin e tij e mori Erik Garcia në startin e fraksionit të dytë të ndeshjes. Megjithatë, situata u përkeqësua kur edhe vetë Garcia u largua me vështirësi të dukshme drejt stolit në çastet e fundit të takimit, duke shtuar dhimbjet e kokës për stafin teknik. Përveç kësaj, trajneri Hansi Flick ka dhënë një lajm tjetër shqetësues në konferencën pas ndeshjes, duke konfirmuar se edhe Jules Kounde ka shfaqur probleme fizike, ndonëse detajet mbeten ende të paqarta për opinionin publik. Duke folur për situatën e brishtë të skuadrës, tekniku gjerman deklaroi: “Nuk e dimë se çfarë do të ndodhë me Erikun. Kunde ka disa probleme të vogla, Zherard po ashtu. Duhet të shohim. Kemi dy ditë më tepër kohë dhe do të shohim çfarë do të ndodhë të martën. Duhet të presim për rezultatin”.