Gara e madhe sportive rikthehet në Tiranë: Ja hartat dhe rrugët që do të bllokohen për ‘Tiranathlon 2026’

Tirana bëhet sërish epiqendra e sportit me rikthimin e garës së përvitshme “Tiranathlon”, një sfidë unike që gërsheton disiplinat e notit, çiklizmit dhe vrapimit në një event të vetëm. Për të garantuar sigurinë dhe mbarëvajtjen e këtij aktiviteti, Bashkia e Tiranës në bashkëpunim me Policinë e Shtetit ka ndërtuar një plan të detajuar për kufizimin e qarkullimit rrugor. Në datën 27 shtator 2026, në harkun kohor nga ora 08:00 deri në 13:00, qarkullimi i automjeteve do të jetë i kufizuar në zonën e Parkut Helen pranë Liqenit të Farkës dhe segmenteve përreth. Rrugët e përfshira në këtë bllokim përfshijnë: rrugën “Daxhit” (nga kryqëzimi me rrugën “Xhelal Molla” deri tek rruga e “Vrapëve”), përfshirë rrugën “Dëshmorët e Helikopterëve”; bulevardet “Zhan D’Ark” dhe “Bajram Curri” (segmenti nga ura e Shkozës deri në kryqëzimin me rrugën “Selman Riza” dhe “Kastriot Feska”); si dhe rrugën interurbane TEG–Ura Shkozë. Gjithashtu, do të ketë kufizime në segmentin e Unazës së Madhe (nga nyja e “Rrethrrotullimit të Freskut” deri te TEG), ku drejtuesit e mjeteve do të devijohen përmes rrugës “Xhanfize Keko”. Ndryshime do të pësojë edhe transporti publik urban. Linja 10/A (Materniteti i Ri – Qendër – Ish Fusha e Aviacionit) do të devijohet përkohësisht te ura e “Brrylit”, ndërsa linja 10/C (Rrethrrotullimi Shkozë – Ish Fusha e Aviacionit) do të pezullohet plotësisht gjatë orarit të garës. Autoritetet sqarojnë se mjetet e emergjencës dhe ato të Policisë së Shtetit do të kenë akses të lirë dhe do të qarkullojnë normalisht në të gjithë itineraret. Zbatimi i këtij plani masash do të mbikëqyret nga strukturat përkatëse të Bashkisë së Tiranës, duke përfshirë Drejtorinë e Rrugëve, Policinë Bashkiake dhe Komisariatin Rajonal të Policisë Rrugore.