Defekti në gypin kryesor lë pa ujë disa lagje të Prishtinës

Kompania Rajonale e Ujësjellësit “Prishtina” ka njoftuar qytetarët se për shkak të një avarie të papritur në rrjetin e shpërndarjes, furnizimi me ujë të pijshëm është ndërprerë në disa pjesë të kryeqytetit. Sipas informacioneve zyrtare, problemi ka ardhur si pasojë e pëlcitjes së një tubacioni me diametër DN 200, i cili ndodhet në afërsi të stadiumit në Hajvali. Ekipet teknike kanë konstatuar dëmin dhe kanë ndërhyrë menjëherë për të izoluar zonën e prekur. Si rrjedhojë, pa ujë kanë mbetur banorët e lagjes Veternik, zona përreth objektit të Gorenjes, pjesë të Hajvalisë, si dhe zona përreth qendrës spitalore Rezonanca. Ekipet e mirëmbajtjes janë aktualisht në terren dhe po angazhohen maksimalisht për sanimin e defektit në kohë sa më të shkurtër, në mënyrë që furnizimi me ujë të normalizohet për të gjithë konsumatorët. Ujësjellësi “Prishtina” ka kërkuar mirëkuptimin e banorëve të këtyre zonave, duke premtuar se do të bëjnë çmos që shërbimi të rikthehet sa më parë.