Kaos dhe shkatërrim në SHBA: Stuhia e fuqishme paralizon verilindjen, shënohet një viktimë

Një stuhi e fuqishme ka gjunjëzuar rajonin verilindor të Shteteve të Bashkuara, duke shkaktuar pasoja të rënda që variojnë nga përmbytjet masive dhe ndërprerjet e energjisë elektrike, deri te bllokimi i transportit dhe anulimi i ngjarjeve të rëndësishme publike. Shërbimi Kombëtar i Motit në SHBA ka lëshuar alarme urgjente për dhjetëra milionë banorë, duke paralajmëruar për rrezikun nga stuhitë bregdetare, erërat shkatërruese dhe reshjet intensive që kanë goditur zona të gjera, përfshirë qytetet e New York-ut dhe Bostonit. Në Nju Jork dhe Nju Xhersi, autoritetet kanë shpallur gjendje të jashtëzakonshme për shkak të situatës kritike, ndërsa efektet e motit të keq janë shtrirë nga Virxhinia deri në Maine. Tragjedia ka goditur Brooklyn-in, ku një person ka ndërruar jetë si pasojë e rrëzimit të një peme nga erërat e forta. Paralelisht, mbi 100 mijë familje janë zhytur në errësirë për shkak të dëmtimit të rrjetit elektrik, ndërsa infrastruktura ajrore është në kaos të plotë: rreth 1,200 fluturime janë anuluar dhe mbi 2,400 të tjera kanë regjistruar vonesa të konsiderueshme. Situata është përkeqësuar nga fenomeni i hënës së plotë, e cila ka rritur ndjeshëm nivelin e ujit, duke shkaktuar përmbytje të banesave dhe rrugëve në komunitete si Surf City dhe Manasquan në Nju Xhersi. Guvernatorja Mikie Sherrill ka apeluar te qytetarët që të tregojnë kujdes maksimal dhe të ndjekin udhëzimet e sigurisë. Në New York City, ku shpejtësia e erës pritet të arrijë deri në 86 km/h, kryetari Zohran Mamdani u ka kërkuar banorëve të shmangin lëvizjet e panevojshme dhe kontaktin me ujërat e përmbytura. Rreziku nga rrëzimi i pemëve dhe dëmtimi i linjave elektrike mbetet tepër i lartë. Stuhia ka diktuar gjithashtu ndryshime në axhendën sportive dhe kulturore. Ndeshja e bejsbollit mes Boston Red Sox dhe Chicago Cubs është zhvendosur për të dielën në Florida, ndërsa takimi i futbollit mes New York Red Bulls dhe St. Louis City SC është anuluar tërësisht. Po ashtu, koncerti i shumëpritur i 'Global Citizen Festival' në Central Park, ku ishin planifikuar performancat e yjeve si Lauryn Hill, Wyclef Jean dhe John Legend, është anuluar për shkak të kushteve të rrezikshme atmosferike.