Agjenda e ditës: Çfarë do të ndodhë këtë të mërkurë në Kosovë – Ngjarjet dhe aktivitetet kryesore të 15 tetorit

Portal i punësimit KosovaJob ka paralajmëruar lansimin e platformës së re KosovaJob 2.0, e cila vjen me një pamje krejtësisht të rifreskuar dhe funksione shtesë si për punëkërkuesit ashtu edhe për bizneset. Ngjarja do të mbahet në hotelin Swiss Diamond në Prishtinë, duke filluar nga ora 9:00. Në Kuvendin e Kosovës, Komisioni për të Drejtat dhe Interesat e Komuniteteve dhe Kthim do të mblidhet në orën 9:30 në sallën N-10, për të analizuar nga këndvështrimi i të drejtave të komuniteteve Projektligjin për ndryshimin dhe plotësimin e Ligjit për Parandalimin e Pastrimit të Parave dhe Luftimin e Financimit të Terrorizmit. Ndërkaq, në orën 10:00, Kuvendi do të mblidhet sërish në sallën e seancave plenare për të zhvilluar punimet e radhës. Ministria e Mjedisit dhe Planifikimit Hapësinor, në bashkëpunim me qeveritë e Gjermanisë dhe Zvicrës përmes organizatës GIZ Kosova, organizon simpoziumin e rëndësishëm “Vizioni hapësinor i Kosovës 2050”. Në këtë ngjarje, e cila nis në orën 10:00 në hotelin Emerald në Prishtinë, është parashikuar të marrë pjesë edhe kryeministri Albin Kurti. Në të njëjtën kohë, në orën 10:00, Instituti i Kosovës për Drejtësi (IKD) do të bëjë publike raportin e tij më të ri me titull “Hulumtim parlamentar: ndërhyrjet e nevojshme para miratimit përfundimtar të Ligjit për Byronë”, në zyrat e këtij instituti në kryeqytet. Po në orën 10:00, Instituti Albanologjik në Prishtinë do të hapë dyert për konferencën shkencore të titulluar “Tekstet e historive për letërsinë shqipe”. Në kuadër të shënimit të Javës së njeriut me shkop të bardhë, Zyra për Qeverisje të Mirë pranë Zyrës së Kryeministrit, në bashkëpunim me Shoqatën e të Verbërve të Kosovës, organizon konferencën me moton “Shkopi i bardhë – simbol i pavarësisë për një shoqëri gjithëpërfshirëse”. Ngjarja do të zhvillohet në ndërtesën e Qeverisë në Prishtinë, duke nisur nga ora 10:30. Instituti Yunus Emre në Kosovë ka njoftuar se në orën 11:00 do të mbajë një konferencë për shtyp për të prezantuar Bienalen e muzikës ballkanike “Rasim Salih”, ku do të shpallen koncertet dhe çmimet kushtuar kontributit në muzikën turke të Ballkanit. Në orën 12:00, Lidhja e Shkrimtarëve e Kosovës do të organizojë manifestimin Përkujtues për Dr. Flora Brovinën. Gjatë këtij aktiviteti, që do të mbahet në lokalet e Lidhjes në rrugën “Jashar Salihu” në Prishtinë, do të lexohen punime kushtuar jetës, veprës dhe krijimtarisë së saj letrare e publike. Sakaq, përgjatë ditës do të vazhdojë edhe seanca gjyqësore në kuadër të rigjykimit të Endrit Nikës.