Vandalizmi në Nunciaturën Apostolike, MEPJ: Të dënohen autorët dhe të mbrohen misionet diplomatike

Ministria për Evropën dhe Punët e Jashtme ka reaguar ashpër ndaj ngjarjeve të ndodhura një dit më parë në selinë e Nunciaturës Apostolike në kryeqytet, duke i cilësuar ato si akte të papranueshme vandalizmi që cënojnë misionet e huaja në vend. Gjatë tubimit të zhvilluar në këtë zonë, protestuesit kanë ndërmarrë veprime të dënueshme, ku spikat heqja e flamurit të Selisë së Shenjtë. Institucioni i diplomacisë shqiptare kujton se ruajtja e integritetit dhe paprekshmërisë së ambasadave dhe përfaqësive të huaja është një detyrim i paneglizhueshëm që mbështetet si në ligjet vendase, ashtu edhe në konventat ndërkombëtare. “Ministria për Evropën dhe Punët e Jashtme dënon aktet e vandalizmit të ushtruara dje tek selia e Nunciaturës Apostolike në Tiranë, përfshirë heqjen e flamurit të Selisë së Shenjtë. Respektimi i paprekshmërisë dhe dinjitetit të përfaqësive diplomatike është një detyrim themelor, në përputhje me legjislacionin shqiptar dhe të drejtën ndërkombëtare”, shprehet zyrtarisht dikasteri i Jashtëm. Edhe pse liria e tubimit dhe protesta paqësore janë shtylla të rëndësishme të demokracisë, autoritetet theksojnë se ato nuk mund të shërbejnë si mbulesë për akte dhune apo shkatërrimi, ndërkohë që kërkohet angazhim maksimal për kapjen e autorëve. “E drejta për të protestuar është pjesë e pandashme e një shoqërie demokratike, por ushtrimi i saj duhet të respektojë ligjin dhe të përjashtojë çdo formë dhune apo vandalizmi. Autorët e akteve të paligjshme duhet të identifikohen dhe të përgjigjen përpara ligjit”, shtohet në njoftim. Në fund të qëndrimit zyrtar, diplomacia shqiptare ka përshëndetur ndërhyrjen e shpejtë të Policisë së Shtetit, duke shprehur bindjen se rrethanat e këtij incidenti do të zbardhen plotësisht dhe se do të vijojë garantimi i një mjedisi të sigurt për çdo përfaqësi diplomatike në territorin shqiptar. “Ministria vlerëson reagimin e Policisë së Shtetit dhe shpreh besimin se institucionet kompetente do të zbardhin plotësisht ngjarjen dhe së bashku me institucionet e përfshira, do të garantojë sigurinë dhe paprekshmërinë e të gjitha përfaqësive diplomatike në Shqipëri”, përfundon deklarata.