Aksion në Mitrovicë: Policia zbulon aktivitet të paligjshëm bixhozi, sekuestrohen çipa dhe armë e ftohtë

Një aktivitet i dyshimtë i bixhozit është goditur nga Policia e Kosovës gjatë një kontrolli të papritur në një objekt afarist në rrugën “Kemajl Ataturk”, në qytetin e Mitrovicës së Jugut. Sipas të dhënave zyrtare të publikuara në raportin 24-orësh të forcave të rendit, ndërhyrja është realizuar gjatë orëve të para të së martës. Gjatë verifikimit të personave që ndodheshin brenda hapësirës, efektivët e policisë kanë kontrolluar njërin prej të dyshuarve, ku gjatë kontrollit fizik i është gjetur dhe sekuestruar në cilësinë e provës materiale një armë e ftohtë (thikë). Në vijim të kontrollit të detajuar të ambientit, autoritetet policore kanë arritur të gjejnë dhe të konfiskojnë katër valixhe që përmbanin gjithsej 1.610 çipa për lojëra fati, si dhe tetë palë letërbixhozi, të cilat përdoreshin për zhvillimin e kësaj veprimtarie të ndaluar. Lidhur me këtë ngjarje, është vënë në dijeni prokurori kompetent i shtetit. Me urdhër të tij, pronari i lokalit është thirrur për t'u intervistuar si i dyshuar, ndërkohë që ndaj tij është hapur një procedurë penale për dy vepra të ndryshme: “Organizimi i skemave piramidale dhe bixhozit të paligjshëm” dhe “Mbajtja në pronësi, kontroll ose posedim i paautorizuar i armëve”.