I riu u dhunua nga policia dhe përfundoi me këmbë të thyer, flet nga spitali: Nuk isha pjesë e protestës

Ministrja e Shëndetësisë, Klodiana Spahiu, ka zhvilluar një vizitë në Spitalin e Traumës për t'u njohur nga afër me gjendjen shëndetësore të 19-vjeçarit, i cili mbeti i lënduar rëndë pas një incidenti të dhunshëm nga efektivët e policisë. Gjatë bashkëbisedimit me ministren, i riu ka sqaruar rrethanat e ngjarjes, duke theksuar se nuk ka pasur asnjë lidhje me protestën. Sipas dëshmisë së tij, ai ka qenë thjesht duke kaluar në rrugë në momentin kur është përballur me dhunën që i shkaktoi thyerjen e këmbës. Si pasojë e këtij incidenti, autoritetet kanë ndërmarrë masa të menjëhershme disiplinore, duke pezulluar nga detyra katër efektivë të policisë, si dhe shefin e Komisariatit Nr. 1. Aktualisht, rasti është nën hetim të thelluar nga ana e Agjencisë së Mbikëqyrjes Policore (AMP) dhe Prokurorisë, të cilat po punojnë për zbardhjen e plotë të dinamikës së ngjarjes dhe përgjegjësive përkatëse.