Zhegrova shkëlqen te Juventusi, mediat italiane kritikojnë ashpër përjashtimin e tij nga Europa League

Edon Zhegrova u shndërrua në protagonistin absolut të Juventusit në barazimin 1-1 ndaj Cagliarit, duke treguar se mbetet një aset i çmuar për skemat e trajnerit Luciano Spalletti. Paraqitja e tij energjike dhe ndikimi i menjëhershëm në lojë pas inkuadrimit në fushë nuk kanë kaluar pa u vënë re nga shtypi sportiv italian. Analizat e fundit theksojnë se me futbollistin kosovar në fushë, ofensiva e bardhezinjve mori një tjetër dimension, duke krijuar raste të shumta shënimi. Megjithatë, kjo paraqitje e mirë ka nxjerrë në pah një paradoks të hidhur: Zhegrova nuk do të jetë në gjendje të ndihmojë skuadrën në Europa League, pasi klubi nuk e ka përfshirë atë në listën zyrtare të dërguar në UEFA. Ky vendim po cilësohet gjithnjë e më shumë si një gabim strategjik, duke marrë parasysh formën e tij aktuale. Duhet rikujtuar se gjatë merkatos së verës, Juventusi tentoi largimin e tij për arsye financiare dhe ofertave të shumta në tavolinë. Megjithatë, Zhegrova refuzoi transferimet në Arabinë Saudite apo destinacione të tjera, duke zgjedhur të qëndrojë në Torino dhe të luftojë për vendin e tij, pavarësisht situatës së komplikuar. Pas një periudhe të vështirë të shënjuar nga dëmtimet, e cila kufizoi hapësirat e tij gjatë kohës së Igor Tudor, futbollisti ka gjetur mbështetjen e Spallettit. Ky i fundit, duke vlerësuar teknikën e tij të rafinuar, e ka pagëzuar me nofkën “Mister Zeppetta”. Ndonëse gjendja e tij fizike kërkon ende menaxhim të kujdesshëm, duke e bërë konkurrencën me Francisco Conceição-n të pabarabartë, prania e Zhegrovës mbetet një garanci për stafin teknik dhe një shtysë për rritjen e nivelit të gjithë repartit ofensiv.