Ethet e Champions League në Stamboll: Biletat për duelin Galatasaray-Barcelona kapin shifra rekord

Përballja e mbrëmjes së sotme mes Galatasarayt dhe Barcelonës ka shkaktuar një valë të jashtëzakonshme interesimi në Stamboll. Ndeshja, e vlefshme për raundin e dytë të Ligës së Kampionëve, pritet të zhvillohet në orën 21:00 dhe është shndërruar në një ndër ngjarjet më të shtrenjta në historinë e futbollit turk, për shkak të prestigjit të kundërshtarit spanjoll. Sipas informacioneve të konfirmuara, kërkesa ka qenë aq e lartë saqë çmimi i një bilete ka arritur në 1 mijë e 520 dollarë, shifër kjo që nuk ka penguar tifozët t'i shterojnë të gjitha biletat në dispozicion. Ky interesim masiv do t'i sjellë arkës së Galatasarayt një përfitim total prej 5 milionë dollarësh vetëm nga shitja e biletave. Ndërkohë, në stadium pritet një atmosferë elektrizuese dhe një përballje mjaft taktike mes dy ekipeve. Kujtojmë se Galatasaray vjen pas humbjes 3-1 në transfertën ndaj Sportingut të Lisbonës, ndërsa Barcelona e ka nisur rrugëtimin evropian në mënyrë spektakolare, duke triumfuar 5-1 përballë Feyenoordit. Publiku në Stamboll pret me padurim këtë duel, i cili premton emocione të garantuara dhe futboll cilësor, duke marrë parasysh filozofinë sulmuese që aplikojnë të dyja skuadrat në fushën e blertë.