Bashkëpunimi ushtarak, gjeneral brigade Mehmet Lladrovci pret në takim delegacionin e lartë nga Turqia

Komandanti i Forcave Tokësore të Forcës së Sigurisë së Kosovës (FSK), gjeneral brigade Mehmet Lladrovci, ka mirëpritur në një vizitë zyrtare komandantin e Komandës së Përbashkët Strategjike Ndërkombëtare, gjenerallejtënant Sebahattin Kilinç, i cili po shoqërohej nga delegacioni i tij. Sipas njoftimit zyrtar për media, në qendër të bisedimeve gjatë këtij takimi të zhvilluar në ambientet e Komandës së Forcave Tokësore kanë qenë hapat e deritanishëm dhe zhvillimi i përgjithshëm i FSK-së, ku vëmendje e veçantë iu kushtua ngritjes dhe modernizimit të kapaciteteve ushtarake të kësaj komande. Nga ana e tyre, përfaqësuesit e delegacionit turk kanë prezantuar praktikat dhe eksperiencën e derisotme të Forcave të Armatosura të Turqisë, me qëllim mbështetjen e zhvillimit profesional dhe avancimin e trupave të FSK-së. Gjatë këtij bashkëbisedimi u vu theksi te rëndësia e madhe e programeve të shkollimit dhe trajnimeve ushtarake që ofrohen në institucionet e Republikës së Turqisë. Në mbyllje të këtij takimi zyrtar, dy krerët ushtarakë kanë dhënë një vlerësim lart për partneritetin dhe aleancën strategjike ndërmjet dy forcave, duke rikonfirmuar vullnetin e përbashkët për të zgjeruar dhe intensifikuar edhe më tej fushat e bashkëpunimit në të ardhmen.