Aktivistja Greta Thunberg mbështet nxënësit francezë në protestat për kushtet në shkolla

Aktivistja e njohur suedeze, Greta Thunberg, u bashkua të martën me nxënësit e shkollave të mesme në Francë, të cilët po protestonin për përmirësimin e kushteve mësimore. Kjo mbështetje erdhi pak kohë para nisjes së një valë të re demonstratash mbarëkombëtare, në një kohë kur si organizatorët ashtu edhe autoritetet kishin shprehur frikë për incidente të mundshme të dhunshme. E reja, e cila fitoj famë ndërkombëtare qysh në moshë të mitur përmes protestave shkollore për luftën ndaj ndryshimeve klimatike, u pa mes protestuesve të mbledhur para një institucioni arsimor në Saint-Denis, që përfaqëson periferinë më të madhe të Parisit dhe njëkohësisht vatrën kryesore të kësaj valë protestash. Prania e Thunberg u regjistrua pranë gjimnazit "Paul Éluard", pikërisht në momentin kur një grup avokatësh po vendoseshin në formë rrethimi për të siguruar mbrojtjen e të rinjve, pas raportimeve të shumta për përdorim të dhunës nga ana e policisë. "Zëri i të rinjve po injorohet plotësisht. E ardhmja jonë po na zhduket para syve", u shpreh ajo në një prononcim për agjencinë e lajmeve AFP. Ky mobilizim popullor, që gëzon mbështetjen e strukturave sindikale dhe forcës politike të majtë ekstreme opozitare "France Insoumise" (Franca e Papërkulur), kishte planifikuar një marshim proteste gjatë mesditës në rrugët e kryeqytetit francez, si dhe protesta paralele në zona të ndryshme të vendit. Në një reagim të shpërndarë në platformën sociale X, sindikata e studentëve "L'Union étudiante" theksoi: "Meqenëse nuk na kushtojnë vëmendje, po detyrohemi t'u afrohemi vetë atyre". Vetëm pak ditë më parë, saktësisht të enjten e kaluar, mbi 70 mijë qytetarë dolën në sheshe në kuadër të marshimit më masiv të nisur që prej muajit shtator. Nxënësit nga e gjithë Franca mbeten të vendosur në qëndrimin e tyre për t'i bërë presion ekzekutivit, me qëllim gjetjen e zgjidhjeve për mangësitë e theksuara në stafin pedagogjik, infrastrukturën e amortizuar shkollore, ngarkesën e tepruar me orë mësimore dhe shqetësime të tjera madhore.