Afera e ryshfetit në Spitalin e Vushtrrisë: 11 të akuzuarit mohojnë fajësinë para gjykatës

Në Gjykatën Themelore të Mitrovicës është mbajtur seanca fillestare ndaj njëmbëdhjetë personave, të cilët përballen me akuza serioze për korrupsion. Në mesin e të pandehurve janë dy kirurgë të Spitalit të Përgjithshëm “Sheikh Zayed” në Vushtrri, Valdet Rexhepi dhe Ekrem Sefiju, të cilët akuzohen për marrje ryshfeti, ndërsa nëntë persona të tjerë dyshohen se kanë ofruar para për të siguruar shërbime mjekësore. Prokuroria Themelore në Mitrovicë ka ngritur aktakuzë kundër kirurgëve Valdet Rexhepi dhe Ekrem Sefiju për veprën penale “Marrje ryshfeti”. Ndërkaq, të dyshuarit e tjerë – Florim Veliu, Besim Grajqefci, Blerim Aliu, Fetah Xhafa, Kamer Hyseni, Labinot Kadriu, Selim Nishori, Berat Qafëleshi dhe Valdet Imeri – akuzohen për veprën penale “Dhënie ryshfeti”. Sipas dokumentit të akuzës, Valdet Rexhepi ngarkohet me gjashtë raste të pranimit të ryshfetit, ndërsa Ekrem Sefiju përballet me tri akuza të natyrës së njëjtë. Prokurorja Fetije Bajrami ka detajuar se si mjekët shfrytëzonin detyrën zyrtare për të përfituar financiarisht nga pacientët ose familjarët e tyre. Në njërin nga rastet e përshkruara, i pandehuri Rexhepi dyshohet se më 4 mars 2026 pranoi 100 euro nga Florim Veliu për operimin e një pacienteje. Po ashtu, ndaj tij rëndon akuza se më 5 mars 2026, nga përfaqësuesi i kompanisë “FexPharma”, Berat Qafëleshi, mori 100 euro me qëllim që të favorizonte përshkrimin e barit “Totalmix” për pacientët. Rexhepi dyshohet gjithashtu se pranoi 300 euro nga Fetah Xhafa për të caktuar datën e operimit të vajzës së tij. Edhe kirurgu Ekrem Sefiju dyshohet se ka operuar në të njëjtën mënyrë, duke kërkuar dhe pranuar pagesa të paligjshme nga familjarët e pacientëve për të kryer shërbimet që i takonin sipas detyrës zyrtare. Të gjithë të pandehurit, në seancën e mbajtur, janë deklaruar të pafajshëm për akuzat e ngritura nga prokuroria.