Glauk Konjufca nga Varshava: Anëtarësimi i Kosovës në BE, mburojë për sigurinë e gjithë kontinentit

Në kuadër të Forumit të Sigurisë që po mbahet në Varshavë, ministri i Punëve të Jashtme, Glauk Konjufca, ka zhvilluar një takim zyrtar me homologun e tij nga Estonia, Margus Tsahkna. Në tryezën e bisedimeve u trajtuan gjerësisht e ardhmja evropiane e Kosovës dhe sfidat e sigurisë në Ballkanin Perëndimor. Përmes një publikimi në rrjetet sociale, kryediplomati kosovar bëri të ditur se ky është takimi i parë me ministrin estonez gjatë këtij viti, duke e cilësuar bashkëbisedimin me të si jashtëzakonisht të sinqertë dhe përmbajtësor. Konjufca vlerësoi lart modelin e Estonisë, duke e quajtur atë një shembull frymëzues se si trashëgimia historike mund të shndërrohet në ndërgjegjësim për lirinë dhe gatishmëri për mbrojtjen e saj, me theks të veçantë në fushat e qeverisjes digjitale dhe sigurisë kibernetike. Diskutimi u fokusua kryesisht te rrugëtimi eurointegrues i Republikës së Kosovës dhe lidhja e drejtpërdrejtë që ai ka me stabilitetin rajonal. Gjatë takimit u shqyrtuan rreziqet e sigurisë, duke përfshirë sfidat nga Serbia, operacionet hibride dhe ndërhyrjet keqdashëse të Moskës, të cilat dëshmojnë se paqja kërkon vigjilencë dhe përkushtim të pandërprerë. "Në qendër të bisedës sonë ishte perspektiva evropiane e Republikës së Kosovës, e lidhur ngushtë me sigurinë e Ballkanit Perëndimor. Kërcënimet që burojnë nga Serbia, veprimet hibride dhe ndikimi keqdashës rus na kujtojnë se paqja nuk është një gjendje që mund të merret si e mirëqenë, por një përgjegjësi që kërkon angazhim të vazhdueshëm. Integrimi evropian i Kosovës është pjesë e forcimit të kësaj paqeje dhe të sigurisë së vetë Evropës," ka shkruar ai. Në përmbyllje të takimit, ministri Konjufca i shprehu mirënjohjen ministrit Tsahkna për partneritetin e sinqertë dhe mbështetjen e palëkundur që Estonia i ka dhënë Kosovës ndër vite, si dhe rikonfirmoi gatishmërinë e dyanshme për intensifikimin e bashkëpunimit dypalësh.