Mitrovicë: Nis ndërhyrja në udhëkryqin 'Nëna Terezë', zonë e njohur për aksidente të rënda trafiku

Kanë filluar zyrtarisht punimet për rregullimin e udhëkryqit te monumenti “Nëna Terezë” në qytetin e Mitrovicës, një pikë kritike e cila ndër vite është karakterizuar nga fluks i rënduar trafiku, vështirësi në qarkullim dhe aksidente të rënda rrugore. Lajmin e ka bërë të ditur kryetari i Mitrovicës, Faton Peci, përmes një njoftimi të publikuar në rrjetet sociale, ku ka shpjeguar se nisma parasheh një transformim rrënjësor të kësaj hapësire. Sipas projektit të prezantuar, ndërhyrja përfshin rikonstruktimin e plotë të nyjës rrugore, instalimin e semaforëve të rinj dhe vendosjen e sinjalistikës së plotë horizontale dhe vertikale, për të garantuar standarde më të larta sigurie. "Me rregullimin e tij do të ketë qasje më të lehtë, siguri e lëvizje më të lirë. Ky projekt përfshin rikonstruktimin e tërësishëm të këtij udhëkryqi, vendosjen e semaforëve, si dhe sinjalistikën përcjellëse rrugore. Mitrovica funksionale është zotimi e angazhimi jonë i përditshëm", ka theksuar Peci në mesazhin e tij.