Rrezik për alergjikët: Agjencia e Ushqimit urdhëron tërheqjen e menjëhershme të produktit “Flips Ketchup” nga tregu

Agjencia e Ushqimit dhe Veterinarisë (AUV) ka lëshuar një urdhër zyrtar për largimin e menjëhershëm nga tregu të produktit ushqimor “Flips Ketchup”, pas konstatimit të papajtueshmërive në përbërjen e tij. Ky vendim vjen pasi autoritetet në Slloveni, gjatë një inspektimi zyrtar, morën mostra të këtij artikulli dhe përmes analizave laboratorike zbuluan praninë e gjurmëve të qumështit, përbërës ky që nuk ishte i deklaruar në etiketë. Përmes Sistemit Evropian të Alarmimit të Shpejtë për Ushqim dhe Ushqim për Kafshë (RASFF) me numër 2026.8267, AUV-i u njoftua për ndalimin e një ngarkese të këtij produkti, me datë skadimi 11.02.2027 dhe prodhues PESTOVA L.L.C, për shkak të mosdeklarimit të alergjenit të qumështit. Vlerësimi i riskut e ka cilësuar produktin si të pasigurt për konsumatorët që janë të ndjeshëm ndaj këtij alergjeni. Pas pranimit të alarmit, inspektorët e AUV-së ndërmorën menjëherë hapa konkretë për të gjurmuar rrugëtimin e prodhimit dhe shpërndarjes. Në kuadër të verifikimeve në terren, inspektorati u paraqit te operatori ekonomik Pestova SHPK. Gjatë këtij kontrolli u konstatua prania në stok e produktit “Flips Ketchup”, me Lot FK 04/26. Dokumentacioni dëshmoi se ky kontingjent kapte shifrën prej 20,406 pakosh të prodhuara, të cilat ishin eksportuar tashmë në disa tregje të ndryshme. Si masë paraprake dhe mbrojtëse për shëndetin e qytetarëve, AUV ka urdhëruar kompaninë përgjegjëse që të tërheqë urgjentisht nga tregu gjithë sasinë e Lot-it FK 04/26. Njëkohësisht, është ndaluar rreptësisht çdo lloj shitjeje apo shpërndarjeje e rezervave që gjenden në depo, ndërsa është vendosur edhe një masë kufizuese për prodhimin dhe hedhjen në treg të artikujve të rinj. Kjo masë do të mbetet në fuqi deri në përfundimin e analizave laboratorike për praninë e alergjenëve dhe korrigjimin e plotë të deklaracionit. Institucioni ka bërë të ditur se do të mbikëqyrë rreptësisht zbatimin e këtyre urdhëresave deri në fund, kur edhe do të merret vendimi përfundimtar për fatin e produktit, në bazë të rezultateve të reja dhe etiketimit të saktë ligjor.