Përplasja tek “Vasil Shanto”: Erion Braçe zbardh versionin e tij dhe hedh poshtë akuzat e aktivistes

Deputeti i Partisë Socialiste, Erion Braçe, ka reaguar përmes një shkrimi të gjerë për të sqaruar dinamikën e debatit të bujshëm që pati një ditë më parë me aktivisten Arvina Lleshi, gjatë një tubimi me banorët në zonën e shkollës “Vasil Shanto” në kryeqytet. Në reagimin e tij, parlamentari socialist ka hedhur poshtë kategorikisht çdo pretendim për fyerje apo dhunë fizike ndaj aktivistes. Sipas tij, ngjarja është regjistruar e plotë nga kamerat e sigurisë në zonë, të cilat provojnë se Lleshi, e shoqëruar nga persona të tjerë, ka ndërprerë mbledhjen dhe ka fyer banorët e pranishëm. Duke dhënë detaje nga zhvillimi i takimit, Braçe bën të ditur se gjatë diskutimeve janë regjistruar mbi 40 ankesa nga dhjetëra banorë, të cilat do të përcillen në institucione për zgjidhje. Ai pretendon se aktivistja ka qenë e qetë në fillim, derisa, sipas tij, ka humbur durimin nën ndikimin e porosive telefonike nga persona të tjerë. Sipas versionit të deputetit, situata ka degraduar në fyerje dhe mallkime ndaj qytetarëve që kishin ardhur për të shprehur hallet e tyre. Braçe thekson se askush nuk ka përdorur dhunë apo fyerje ndaj saj, por përkundrazi, qytetarët janë sjellë me maturi dhe mirëkuptim, duke i ofruar edhe ndihma simbolike për ta qetësuar. Në përmbyllje të reagimit të tij, ligjvënësi socialist ka ngritur dyshime edhe rreth statusit profesional të aktivistes, duke lënë të kuptohet se veprimet e saj në terren mund të jenë të organizuara dhe të motivuara nga interesa të caktuara politike.