PLD: Rasti i Iva Mihajlovës dëshmon dështimin total të institucioneve shtetërore

Partia Liberal Demokratike (PLD) ka shprehur revoltën e saj të thellë ndaj skandaleve të njëpasnjëshme që po tronditin opinionin publik, duke i cilësuar ato si dëshmi të qarta të shembjes së strukturave shtetërore dhe konsolidimit të një sistemi të padrejtësisë. "Ne e shkëputim rastin e Iva Mihailovës nga çdo konotacion etnik dhe nuk do t'u lëmë hapësirë elementëve nacional-shovinistë në rajon për të shfrytëzuar tragjeditë njerëzore për fushata etno-populiste. Reagimet nga Sofja janë tronditëse dhe dëshmojnë se vendi ynë po përballet me një errësirë totale në zbatimin e ligjit, për të mos folur për vlerat e drejtësisë evropiane", theksojnë nga radhët e PLD-së. Sipas kësaj partie, Mihailova tani duhet të përballet me ndjekje penale për një vepër të re penale, ndërsa situata bëhet edhe më alarmante për shkak të deklaratës publike të avokatit të saj para autoriteteve bullgare dhe vendase, i cili u shpreh se ajo "e mori fatin në duart e veta". "Një skandal i tillë përbën një katastrofë të vërtetë juridike. Tragjedia e mirëfilltë në Maqedoni qëndron në faktin se kolapsi institucional ka sjellë situatën ku personi i dyshuar për shkaktimin e një vdekjeje në aksident trafiku, në vend që t'i nënshtrohet drejtësisë dhe vendimeve gjyqësore, trajtohet si viktimë dhe shndërrohet në një yll të një 'reality show' të lirë dhe të neveritshëm. Nuk ka qytetar në vend që të mos ndjejë neveri nga lejimi i një skenari të tillë", thuhet tutje në reagim. PLD vë në pah se vendi ka nevojë urgjente për një polici funksionale, kamera sigurie funksionale në vendkalimet kufitare dhe shërbime që garantojnë se personat me pasaporta të konfiskuara dhe ndalesa largimi mbeten nën mbikëqyrjen e autoriteteve. "Nëse e gjithë kjo strukturë rezulton të jetë një farsë e dështuar, mesazhi është sa i qartë aq edhe tronditës: në Maqedoni mund të shkaktosh vdekje, të vjedhësh e të shkatërrosh, dhe në fund të lëvizësh lirshëm jashtë shtetit duke u paraqitur si viktimë. E gjithë kjo ndodh në një kohë kur pushteti aktual mban kontrollin absolut, duke zotëruar pushtetin legjislativ, shumicën kushtetuese, qeverisjen lokale, skenën mediatike dhe madje edhe monitorimin e kamerave të sigurisë".