Zgjedhjet e 25 tetorit në Serbi: Muharrem Salihu bën thirrje për bashkim dhe synon tre ulëse për Luginën

Afaristi dhe humanisti i njohur shqiptar, Muharrem Salihu, ka bërë thirrje urgjente për një mobilizim të gjithanshëm të akterëve politikë dhe qytetarëve në Luginën e Preshevës, me qëllim parësor sigurimin e tre mandateve deputetësh në Kuvendin e Serbisë gjatë zgjedhjeve të datës 25 tetor. Salihu ka vënë inë pah se procesi i ardhshëm zgjedhor parlamentar paraqet një mundësi të artë për të ngritur në një nivel më të lartë përfaqësimin e popullsisë shqiptare nga Presheva, Medvegja dhe Bujanoci, duke kërkuar unifikimin e elektoratit rreth një liste të vetme të përbashkët. “Bashkësia shqiptare dhe të gjitha bashkësitë e tjera kanë mundësinë ta kthejnë këtë parim në një veprim konkret politik: bashkimin e votës për të synuar dërgimin e tre deputetëve shqiptarë nga Presheva, Medvegja dhe Bujanoci në Parlamentin e Republikës së Serbisë”, ka deklaruar Salihu. Sipas tij, ngritja e një zëri më të fuqishëm institucional kërkon domosdoshmërisht bashkëpunim të ngushtë jo vetëm brenda trungut shqiptar, por edhe me minoritetet dhe komunitetet e tjera që jetojnë në këtë trekëndësh komunal. Në vlerësimin e tij, mbështetja e një platforme zgjedhore të përbashkët do të ndikonte drejtpërdrejt në përmirësimin e raporteve ndëretnike dhe në ngjeshjen e bashkëpunimit ndërkomunitar. “Për komunitetet joshqiptare, kjo është një mundësi për të shënuar një hap historik në marrëdhëniet ndëretnike, duke hapur një kapitull të ri të bashkëjetesës, besimit dhe bashkëpunimit, në frymën e vlerave dhe integrimit europian. Mbështetja e një liste të përbashkët nuk duhet parë si favor ndaj dikujt tjetër, por si investim në një të ardhme ku zëri dhe interesat e të gjitha komuniteteve marrin peshën që meritojnë”, ka theksuar ai. Salihu ka qenë i prerë se fati i banorëve të Preshevës, Medvegjës dhe Bujanocit duhet të trajtohet si i pandashëm, pa lejuar që ai të kushtëzohet nga përkatësitë etnike apo agjendat e ditës të politikës ditore. “Kohezioni lokal është burim force dhe faktorizimi përballë pushtetit qendror. Sa më të bashkuara të jenë Presheva, Medvegja dhe Bujanoci rreth interesave të përbashkëta, aq më i fortë do të jetë zëri i tyre në institucionet e Republikës së Serbisë”, ka shkruar Salihu. Ai ka shtuar se mozaiku etnik duhet të funksionojë si katalizator i bashkëpunimit dhe harmonisë ndëretnike, dhe jo të shfrytëzohet si instrument përçarjeje, diskriminimi apo izolimi. Në optikën e Salihut, data 25 tetor përbën një sprovë të qartë ku komunitetet e kësaj zone duhet të shfaqin vullnetin e palëkundur për bashkëpunim dhe përfaqësim dinjitoz në instancat qendrore shtetërore në Beograd. “Tashmë nuk mjaftojnë fjalët për bashkëjetesë. Duhen vullnet politik, përgjegjësi dhe veprim konkret. Zgjedhjet e 25 tetorit janë një mundësi për të dëshmuar se, pavarësisht dallimeve, ne mund të bashkohemi rreth interesit të përbashkët dhe të ndërtojmë një zë më të fortë për të ardhmen e të gjitha komuniteteve të Preshevës, Medvegjës dhe Bujanocit”, ka përfunduar Salihu.