Tragjedi në Athinë: Humb jetën drejtuesi i motorit pas përplasjes me makinën e shqiptarit

Një ngjarje e rëndë ka tronditur kryeqytetin grek në orët e para të mëngjesit të së martës, ku një 35-vjeçar vendas ka ndërruar jetë si pasojë e një aksidenti rrugor, në të cilin është përfshirë edhe një shtetas shqiptar 52 vjeç që drejtonte një automjet. Aksidenti fatal ka ndodhur rreth orës 03:00 në zonën e Pagratit në Athinë. Sipas informacioneve paraprake nga autoritetet policore vendase, makina që drejtohej nga 52-vjeçari po qarkullonte në rrugën Filolau, e cila gëzonte të drejtën e përparësisë, ndërkohë që motori i drejtuar nga 35-vjeçari po afrohej nga rruga Frynis. Në momentin e përplasjes fatale, semaforët në atë kryqëzim kanë qenë jashtë funksionit. Frika e goditjes ka qenë mjaft e fortë, duke bërë që drejtuesi i motorit të pësojë lëndime fatale dhe të ndërrojë jetë në vend. Ndërkaq, pas goditjes, automjeti ka dalë jashtë rrugës dhe ka përplasur pesë makina të parkuara, duke shkaktuar dëme të konsiderueshme materiale. Menjëherë pas ngjarjes, uniformat blu shoqëruan drejtuesin shqiptar, por me vendim të prokurorit ai është lënë i lirë, pasi nga verifikimet e para është konstatuar se ai nuk mbart përgjegjësi ligjore për aksidentin. Tashmë, Policia Rrugore e Atikës ka nisur hetimet zyrtare për të hedhur dritë mbi të gjitha rrethanat dhe shkaqet e këtij fataliteti.