FSK kurorëzon me sukses stërvitjen ndërkombëtare “VALOR SHIELD 2026”

Ministri i Mbrojtjes, Ejup Maqedonci, ka bërë të ditur se Operacionet Speciale të Forcës së Sigurisë së Kosovës (FSK) kanë kurorëzuar me sukses stërvitjen fushore të njohur si “VALOR SHIELD 2026”. Kjo ngjarje e rëndësishme ushtarake është zhvilluar në koordinim të ngushtë me njësitë e operacioneve speciale të Shteteve të Bashkuara të Amerikës, Shqipërisë dhe Kroacisë, krahas agjencive dhe institucioneve vendase të sigurisë së Republikës së Kosovës. Sipas kreut të Mbrojtjes, ky operacion fushor shërben si dëshmi e qartë e ngritjes së standardeve operacionale të FSK-së, ngritjes së shkallës së profesionalizmit dhe thellimit të bashkëveprimit me aleatët strategjikë. Nëpërmjet investimeve të vazhdueshme në trajnime të avancuara, përgatitje profesionale dhe partneritet global, FSK po vijon rrugëtimin drejt ndërtimit të një force bashkëkohore, plotësisht të aftë dhe të përgatitur për të çuar në vend misionin e saj kushtetues.