Situatë e tensionuar jashtë studios: Gani Geci afrohet te RTV Dukagjini pas përplasjes me gazetarin

Një ngjarje e pazakontë ka ndodhur në mbyllje të emisionit “Debat Plus” në RTV Dukagjini, ku drejtuesi i emisionit ka njoftuar publikisht se disa persona po i prisnin jashtë ambienteve të televizionit. Gjatë transmetimit live, ku të ftuar ishin gazetari Lirim Mehmetaj dhe deputeti i PDK-së, Përparim Gruda, u bë e ditur se në rrjetet sociale kishin nisur të qarkullonin pamje filmike të personave që qëndronin në pritje pranë zonës së njohur si “te reforma”. Burime konfirmojnë se personi në fjalë që kishte shkuar pranë ndërtesës së televizionit ishte Gani Geci. Kjo situatë e tensionuar erdhi vetëm pak orë pas një fërkimi publik në distancë ndërmjet Gecit dhe gazetarit Lirim Mehmetaj, nismë kjo që kishte buruar nga një shkrim i gazetarit lidhur me deputetin e Lëvizjes Vetëvendosje, Fatos Geci, i cili kishte bërë deklarata të ashpra në adresë të ish-presidentit Hashim Thaçi dhe ish-krerëve të tjerë të UÇK-së. Tensioni u përshkallëzua edhe më shumë gjatë ditës së hënë, kur Gani Geci pretendoi përmes një shkrimi në rrjetet sociale se kishte arritur një marrëveshje pajtimi mes familjes së tij dhe asaj të gazetarit Mehmetaj. Sipas pretendimeve të tij, takimi ishte mbajtur në restorantin “Garden” me ndërmjetësimin e figurave të njohura, deputetit Anton Quni dhe Fadil Hadërgjonajt, duke shtuar se palët ishin zotuar të mos merreshin më me njëra-tjetrën në medie apo shkrime. Megjithatë, reagimi i gazetarit Lirim Mehmetaj ka qenë i menjëhershëm dhe i prerë, duke hedhur poshtë çdo mundësi të tërheqjes nga qëndrimet e tij. Përmes një postimi në Facebook, ai theksoi se nuk do t’i fshijë asnjë shkronjë postimit të tij, duke shtuar se do të vazhdojë të ekspozojë dhe kritikojë publikisht ata që, sipas tij, keqinformojnë opinionin publik. Në kohën kur moderatori i emisionit lëshoi paralajmërimin për personat që prisnin jashtë, Gani Geci ishte afruar tashmë pranë selisë së RTV Dukagjinit. Madje, në një video të shpërndarë në platformën TikTok, Geci shihet duke folur nga vetura e tij, ku ndër të tjera dëgjohet të thotë se “nuk kam punë me policinë”.