Mungesa e deklarimit të alergjenëve: AUV tërheq nga tregu produktin “Flips Ketchup” të prodhuesit “PESTOVA”

Agjencia e Ushqimit dhe Veterinarisë (AUV) ka ndërmarrë hapa urgjentë duke larguar nga qarkullimi tregtar produktin “Flips Ketchup”, me datë skadimi 11.02.2027 dhe prodhues “PESTOVA L.L.C”, pasi përmes Sistemit Evropian të Alarmimit të Shpejtë për Ushqim dhe Ushqim për Kafshë (RASFF) është njoftuar për mos-deklarimin e pranisë së qumështit si alergjen. Ky veprim pasoi pas një kontrolli zyrtar të kryer në Slloveni, ku gjatë marrjes së mostrave dhe analizave laboratorike të këtij artikulli ushqimor, u konstatua prania e gjurmëve të qumështit, përbërës ky që mungonte në etiketën deklaruese. Në bazë të vlerësimit të riskut të ofruar nga sistemi RASFF, produkti u cilësua si i rrezikshëm për konsumatorët që shfaqin ndjeshmëri ndaj qumështit. Për rrjedhojë, AUV-i aktivizoi menjëherë mekanizmin e gjurmueshmërisë për të monitoruar mbarëvajtjen e prodhimit dhe shpërndarjes. Inspektorët e AUV-së zbarkuan menjëherë në ambientet e operatorit “PESTOVA SHPK” për të verifikuar situatën në terren dhe për të aplikuar masat e duhura ligjore. Gjatë këtij inspektimi u vërejt se produkti “Flips Ketchup”, me Lot FK 04/26, ndodhej ende në stok. Sipas dokumentacionit zyrtar, sasia e prodhuar e këtij Cikli ishte 20,406 pako, të cilat tashmë kishin nisur të eksportoheshin në tregje të ndryshme. Si masë paraprake, AUV urdhëroi kompaninë që të bëjë tërheqjen e menjëhershme të gjithë sasisë me Lotin FK 04/26, si dhe ndaloi rreptësisht çdo lloj shitjeje apo shpërndarjeje nga depot. Krahas kësaj, u vendos një masë kufizuese për prodhimin dhe hedhjen në treg të artikujve të rinj të këtij lloji, deri në momentin kur analizat laboratorike të konfirmojnë gjendjen e alergjenëve ose të bëhet korrigjimi i plotë i deklaracionit. Procesi i mbikëqyrjes do të vijojë deri në përmbylljen e plotë të çështjes. Fati i mëtutjeshëm i produktit do të përcaktohet pas sigurimit të rezultateve të reja laboratorike dhe përshtatjes së etiketimit me legjislacionin në fuqi. Nëpërmjet një apeli publik, AUV u bën thirrje qytetarëve që të tregojnë kujdes të shtuar gjatë procesit të blerjes. Në rast se e konstatojnë këtë produkt në treg, luten të njoftojnë autoritetet menjëherë, ndërsa ata që e kanë blerë tashmë dhe e posedojnë në shtëpi, këshillohen ta kthejnë në pikën përkatëse të shitjes. Në njoftimin zyrtar theksohet se Ministria e Bujqësisë, Pylltarisë dhe Zhvillimit Rural, në bashkëpunim të ngushtë me AUV-në, mbetet plotësisht e angazhuar për të ruajtur standardet e sigurisë ushqimore dhe për të mbrojtur shëndetin e konsumatorëve, duke garantuar monitorim të vazhdueshëm ndaj çdo dyshimi të mundshëm në treg.