Drenasi përkujton heronjtë e 26 shtatorit: Homazhe dhe nderime për sakrificën e familjes Deliu dhe dëshmorët e lirisë

Në shënim të 28-vjetorit të rënies së dëshmorëve dhe martirizimit të familjes Deliu, kryetari i Komunës së Drenasit, Ramiz Lladrovci, i shoqëruar nga bashkëpunëtorë dhe familjarë, ka zhvilluar homazhe nderimi për të gjithë ata që dhanë jetën më 26 shtator 1998. Sipas njoftimit zyrtar të institucionit komunal, nderimet filluan në Abri të Epërme, pranë Memorialit të familjes Deliu, ku u përkujtuan anëtarët e kësaj familjeje të vrarë gjatë luftës. Në të njëjtën ditë, në varrezat e dëshmorëve u bënë homazhe edhe për të rënët Valdet Xhemajli, Vesel Demaku dhe Afrim Hajdaraj. Respekti ndaj figurave të luftës u shpreh edhe përmes vizitave në lokacione të tjera historike. Në rrugën për në Tërdec, u nderuan dëshmorët Syl, Idriz dhe Milazim Balaj, ndërsa në kompleksin e varrezave “Pëllumbat e Lirisë” në Negroc, u përkujtuan Fatos Krasniqi dhe Skënder Shala. Komuna e Drenasit ka vlerësuar lartë figurën e të rënëve, duke theksuar se trashëgimia e tyre është gurthemeli i lirisë së Kosovës. “Sakrifica e tyre mbetet kujtim i përhershëm dhe dëshmi e çmimit të lartë të lirisë”, thuhet në deklaratën e komunës, duke rikonfirmuar përkushtimin për ruajtjen e vlerave të luftës.