Partneriteti me SHBA-në, Shiroka Pula: Integrimi në NATO është prioritet strategjik për sigurinë rajonale

Kreu i shtetit të Kosovës, Justina Shiroka Pula, ka zhvilluar një takim zyrtar me dy senatorët amerikanë, Jeanne Shaheen dhe Dick Durbin. Gjatë këtij takimi, ajo vlerësoi lart partneritetin e palëkundur dhe mbështetjen e vazhdueshme bipartizane nga Shtetet e Bashkuara të Amerikës, të cilat i cilësoi si aleate strategjike dhe partnere të pazëvendësueshme për vendin. Në këtë drejtim, u vu theksi te domosdoshmëria e rifillimit urgjent të Dialogut Strategjik, si një mekanizëm kyç për forcimin e bashkëpunimit dypalësh dhe realizimin e qëllimeve të përbashkëta. Presidentja bëri të qartë se aspirata kryesore e Republikës së Kosovës mbetet anëtarësimi në Aleancën Veriatlantike (NATO). “Mbështetja e Shteteve të Bashkuara është kyçe në këtë rrugëtim. Anëtarësimi i Kosovës në NATO do të thotë më shumë siguri dhe stabilitet jo vetëm për vendin tonë, por për të gjithë rajonin”, ka deklaruar Presidentja Shiroka Pula. Ajo shprehu mirënjohjen e thellë ndaj senatores Shaheen për angazhimit e saj të pandërprerë në dobi të Kosovës, duke veçuar përkrahjen e saj për ruajtjen e trupave ushtarake amerikane brenda misionit të KFOR-it. Letra e adresuar Sekretarit të Shtetit, Marco Rubio, u cilësua si një hap me peshë të madhe strategjike, që kontribuon drejtpërdrejt në sigurinë e vendit dhe shmangien e tensioneve në hapësirën rajonale. Gjithashtu, u evokua reagimi i prerë i senatores Shaheen pas sulmit të armatosur të 24 shtatorit 2023 në Banjskë, ku humbi jetën rreshteri Afrim Bunjaku, si dhe kërkesa e saj e vazhdueshme që autorët të përballen me drejtësinë. Si shenjë falënderimi për kontributin e jashtëzakonshëm në lirinë, paqen dhe sigurinë e Kosovës, Presidentja Shiroka Pula i akordoi senatores Jeanne Shaheen Medaljen Presidenciale të Meritave.