Bilanci tragjik i zjarreve në Maqedoni: Dhjetëra mijëra hektarë të shkrumbuar dhe dyshime të forta për zjarrvënie të qëllimshme

Sezoni i kaluar i zjarreve ka lënë pas pasoja shkatërruese në mjedis, duke shkrumbuar dhjetëra mijëra hektarë sipërfaqe tokë, me dëme materiale që kapin shifrën e miliona eurove, ndërkohë që autoritetet po hetojnë dhjetëra raste të dyshuara për zjarrvënie të qëllimshme. Referuar statistikave zyrtare, gjatë vitit 2026 janë regjistruar rreth 41 mijë hektarë sipërfaqe të djegura. Ndërkohë, Ndërmarrja Publike Pyjet Kombëtare raportoi se vetëm deri në mbyllje të muajit korrik janë shënuar 138 vatra zjarri në pyje, kurse dëmet e llogaritura deri në atë periudhë tejkalonin shifrën e 4 milionë eurove. Kriza e flakëve u shtri edhe përgjatë muajit gusht, ndërsa bilanci përfundimtar mbetet ende për t'u përllogaritur, pasi vatrat e zjarrit vazhduan të aktivizoheshin edhe në shtator si pasojë e temperaturave të larta. ”Këtë vit deri në muajin korrik kishim 138 zjarre. Në muajin shtator ky numër do të arrije deri në 150 zjarre që do të thotë se vitin do e mbyllim me këtë numër. Këtë vit deri në muajin e shtatë, dëmi ka kaluar mbi katër milion euro por duke mos llogaritur edhe zjarret e mëdha që nuk janë llogaritur siç ishte ai në Kitkë i cili ishte një nga zjarret më të mëdhenj këtë vit,” deklaroi Kire Mihailov, zëvendësdrejtor i Ndërmarrjes Publike Pyjet Kombëtare. Përballë kësaj situate alarmante, deri në përfundim të muajit gusht, organet e rendit kanë ndaluar 30 persona nën dyshimin e bazuar për përfshirje në zjarrvënie të qëllimshme. ”Nga informata që e kam, më shumë se 30 persona në vitin 2026, ishin të ndaluar nga policia nën dyshimin se janë piromanë. Procedurat janë në vijim dhe gjykata dhe prokuroria e vazhdojnë procedurën por ky numër është numër serioz,” u shpreh zëvendësdrejtori Mihailov. Të dhënat nga Enti Shtetëror i Revizionit dëshmojnë një panoramë edhe më të zymtë për vitet e kaluara, ku vetëm gjatë periudhës 2023–2025 janë shkrumbuar mbi 82 mijë hektarë tokë pyjore dhe janë dëmtuar më shumë se 914 mijë metra kub dru në mbarë vendin. Vlera totale e dëmeve për këto vite llogaritet në rreth 133 milionë euro. Sipas statistikave zyrtare, viti 2024 spikat si periudha më kritike dhe më e vështirë, gjatë së cilës dëmet materiale u vlerësuan në mbi 83 milionë euro.