Data e re: Më 17 nëntor jepet vendimi për Hashim Thaçin në rastin e pengimit të drejtësisë

Gjykata Speciale pritet që më 17 nëntor të shpallë aktgjykimin e radhës ndaj ish-presidentit të Kosovës, Hashim Thaçi, në kuadër të çështjes së njohur si rasti “12”, ku ai përgjigjet për akuzat e pengimit të drejtësisë. Në këtë proces gjyqësor, Prokuroria e Specializuar ka kërkuar që periudha që ish-kreu i shtetit e ka kaluar në paraburgim të mos llogaritet, duke argumentuar se kjo kohë mund të zbritet vetëm nga dënimi prej 25 vjetësh që iu shqiptua atij në rastin “06” për krime lufte. Për rastin “12”, akuza ka kërkuar që ndaj Thaçit të jepet një dënim prej gjashtë vjetësh heqje lirie. Nëse gjykata miraton kërkesën e ZPS-së që koha e paraburgimit të mos llogaritet, atëherë dënimi total i ish-presidentit në Speciale mund të arrijë deri në 31 vite burg, duke llogaritur bashkërisht të dyja vendimet. Sa i përket të pandehurve të tjerë në të njëjtin proces, Prokuroria ka kërkuar dënime me nga tri vjet burgim për Bashkim Smakajn, Isni Kilajn dhe Fadil Fazliun, ndërsa për Hajredin Kuçin është kërkuar një dënim prej nëntë muajsh.