Brukseli dhe Prishtina shtrojnë për diskutim reformat sociale, digjitalizimin dhe inovacionin

Delegacionet nga Kosova dhe Komisioni Evropian zhvilluan më 8 tetor në Bruksel takimin e radhës, i cili shënoi sesionin e tetë të Nënkomitetit të Marrëveshjes së Stabilizim-Asociimit të përqendruar te inovacioni, shoqëria e informacionit dhe politikat sociale. Agjenda e takimit përfshiu një spektër të gjerë temash kyçe, duke përfshirë arsimin, çështjet e rinisë, punësimin, zhvillimet në telekomunikacion, shoqërinë digjitale, si dhe mbrojtjen e trashëgimisë kulturore, sipas komunikatës zyrtare për media. Në sektorin e punësimit, zyrtarët evropianë bënë thirrje për miratimin e menjëhershëm të projektligjeve që kanë mbetur prapa në kohë, të cilat rregullojnë marrëdhëniet e punës, sigurinë dhe shëndetin në mjedisin profesional, si dhe harmonizimin mes jetës familjare dhe asaj të punës, elementë këta që renditen lart në agjendën qeveritare. Kërkohet përfundimi urgjent i procesit të ristrukturimit për Agjencinë e Punësimit dhe ngritja e kapaciteteve të saj, me qëllim që masat aktive në tregun e punës të japin rezultate ta prekshme në uljen e papunësisë dhe pasivitetit, sidomos te gjinia femërore. Gjithashtu, ekzekutivi u nxit të garantojë burime të mjaftueshme njerëzore dhe buxhetore për Inspektoratin e Punës, si dhe të rrisë transparencën rreth raportimit të incidenteve në vendin e punës. Brukseli çmoi nismën pilot të Skemës së Garancisë për të Rinjtë për adresimin e dukurisë së të rinjve jashtë punësimit, arsimit apo trajnimit (NEET), duke kërkuar kushte për jetësimin e plotë të saj, krahas fuqizimit të sindikatave dhe shoqatave të punëdhënësve për dialog social dhe marrëveshje kolektive të pavarura. Sa i takon përfshirjes dhe mbrojtjes sociale, Komisioni Evropian evidentoi hapat e deritashëm drejt ndryshimeve rrënjësore të skemave të ndihmës sociale, duke theksuar domosdoshmërinë e finalizimit të tyre dhe miratimit të Ligjit për Asistencën Sociale dhe Përfitimet Sociale. Vëmendje e veçantë iu kushtua inspektimit të rregullt të shërbimeve sociale dhe sigurimit të një financimi të qëndrueshëm komunal përmes një granti të dedikuar buxhetor. Në rrafshin e shoqërisë së informacionit, u vlerësua funksionalizimi i bartshmërisë së numrave, që garanton konkurrencë të drejtë mes operatorëve mobilë. Kosova u inkurajua të vijojë me zbatimin e Strategjisë së Qeverisjes Elektronike 2023–2028, Agjendës Digjitale 2023 dhe zgjerimin e platformës eKosova. Po ashtu, u kërkuan fonde për Strategjinë kombëtare të sigurisë kibernetike dhe harmonizim të plotë ligjor me Direktivën NIS2 të BE-së, Rregulloren për identitetin elektronik dhe Kodin evropian të komunikimeve elektronike. Në fushën e politikave audiovizuale, palët u pajtuan se autoritetet duhet të vazhdojnë përpjekjet për përafrimin e kuadrit ligjor me Direktivën për shërbimet mediatike audiovizuale dhe Aktin evropian për lirinë e medias.