Kriza thellohet te Partizani pas humbjes në derbi, shkarkohet trajneri Florin Bratu

Florin Bratu nuk do të jetë më në krye të stafit teknik të Partizanit, pasi drejtimi i klubit ka vendosur t'i japë fund bashkëpunimit me trajnerin rumun. Ky vendim vjen si pasojë e drejtpërdrejtë e disfatës 1-3 në ndeshjen derbi kundër Tiranës, e cila u shoqërua edhe me ecurinë negative të rezultateve gjatë kësaj faze të parë të sezonit. Pas një takimi të zhvilluar mes drejtuesve më të lartë dhe teknikut, ku prezent ka qenë edhe presidenti Gazment Demi, palët kanë arritur një dakordësi për prishjen me mirëkuptim të kontratës njëvjeçare, duke mbyllur kështu para kohe bashkëpunimin. Deri në emërimin e një zëvendësuesi zyrtar, skuadra do të drejtohet përkohësisht nga Alfred Deliallisi. Trajner i ekipit B, ai do të marrë frenat e skuadrës së parë për të siguruar vijueshmërinë e seancave stërvitore. Ndërkaq, zyrtarët e klubit të kuq janë vënë në lëvizje për të siguruar profilin e ri në stol. Burimet bëjnë me dije se në shqyrtim janë disa alternativa, ku më të spikaturat janë dy opsione nga jashtë vendit, konkretisht një teknik spanjoll dhe një kroat, me të cilët bisedimet janë në zhvillim e sipër.