Konflikt pronësie për amfiteatrin në Mitrovicë të Veriut, “Trepça” ndërhyn përmes gjykatës

Ndërmarrja “Trepça” Sh.A. ka konfirmuar se nuk ka dhënë asnjë lloj pëlqimi apo autorizimi për ndërtimin e amfiteatrit në sheshin e Mitrovicës së Veriut, duke ndërmarrë hapa ligjorë për mbrojtjen e pasurisë së saj. Në një prononcim zyrtar, drejtuesit e “Trepçës” bënë të ditur se nuk kanë pranuar asnjë kërkesë formale për t'i hapur rrugë punimeve në atë hapësirë. Për këtë arsye, ndërmarrja iu drejtua drejtësisë për të ndalur punimet që po zhvilloheshin pa miratimin e saj. Projektimi i amfiteatrit, me vlerë 50 mijë e 475 euro, kishte nisur më 14 shtator. Megjithatë, më 23 shtator, Gjykata Themelore në Mitrovicë mori vendim për masë të përkohshme ndaj Komunës së Mitrovicës së Veriut, duke pezulluar çdo punim të mëtutjeshëm në atë lokacion. Sipas vlerësimit të Gjykatës, parcelat ku kanë filluar ndërhyrjet figurojnë në pronësi të “Trepçës”, ndërsa provat e siguruara konfirmojnë nisjen e punimeve. Gjykata vlerësoi se ndërmarrja ka dëshmuar bazueshmërinë e pretendimeve pronësore, duke ndaluar çdo lloj ndërhyrjeje, shfrytëzimi apo aktiviteti nga ana e Komunës deri në një vendim tjetër. Në krahun tjetër, nënkryetarja e Komunës së Mitrovicës së Veriut, Adriana Hoxhiq, e pati cilësuar këtë situatë si një keqkuptim ndërmjet autoriteteve komunale dhe ndërmarrjes. Ndërkohë, “Trepça” ka intensifikuar aksionet e saj gjatë muajve të fundit për të rikthyer nën administrim pronat e veta në pjesën veriore të vendit, të cilat sipas saj kanë qenë jashtë kontrollit për një kohë të gjatë. Në këtë kuadër, janë rikthyer disa lokale në rrugën “Koloshini” që kishin mbetur pa u menaxhuar për 27 vjet, si dhe një objekt në Zveçan që më parë shfrytëzohej nga ish-Banka Komerciale. Për të siguruar transparencë, ndërmarrja vendosi njoftime në hyrje të pronave duke kërkuar dokumentacionin nga shfrytëzuesit. Kryeshefi i ndërmarrjes, Faton Ahmeti, pati paralajmëruar se mungesa e dokumenteve ligjore do të sillte masa për lirimin e hapësirave. Në prill, “Trepça” ndërmori një aksion ku rrënoi mbi 20 garazhe dhe objekte të tjera afër Qendrës së Paraburgimit në Mitrovicë të Veriut, pasi u konstatua se ishin ndërtuar në mënyrë të paligjshme në pronat e saj, pas një afati dydhujor të lënë për palët. Ky aksion ngjalli reagimin e kryetarit të atëhershëm të Komunës së Mitrovicës së Veriut, Milan Radojeviq, i cili u shpreh se komuna nuk ishte njoftuar paraprakisht. Debati rreth pasurive të kësaj ndërmarrjeje u zhvendos edhe në Kuvendin Komunal të Mitrovicës së Veriut më 30 shtator, ku asamblisti Marko Jakshiq kërkoi trajtimin e kësaj teme në rendin e ditës.