Ndikimi i kryeministrit Kurti në zgjedhjet në Serbi: Si po e përdor opozita çështjen e Kosovës kundër Vuçiqit

Kryeministri i Kosovës, Albin Kurti, është shndërruar në një nga boshtet kryesore të diskutimeve në skenën politike dhe fushatën zgjedhore në Serbi. Kështu vlerëson eksperti i sigurisë, Avni Islami, sipas të cilit dinamikat e reja në Kosovë po përdoren nga aktorët politikë serbë për përplasje të brendshme. Në analizën e tij, Islami shpjegon se opozita në Serbi po ia përmend vazhdimisht presidentit Aleksandar Vuçiq sukseset e arritura nga Prishtina zyrtare në veri të vendit. Këtu përfshihen shtrirja e sovranitetit dhe integritetit territorial, funksionalizimi i institucioneve, kontrolli mbi liqenin e Ujmanit dhe asetet e tjera strategjike, si dhe goditja e grupeve kriminale, terroriste dhe rrjeteve të spiunazhit. Në anën tjetër, kreu i shtetit serb po përpiqet të mbrohet duke hedhur akuza ndaj opozitës dhe studentëve, të cilët i lidh gjoja me një bashkëpunim të fshehtë me kryeministrin e Kosovës. Vuçiq tenton t'i paraqesë kritikat e brendshme si një koordinim të kundërshtarëve të tij politikë me Prishtinën. Eksperti i sigurisë thekson se derisa shtetet e tjera të rajonit e shohin Kosovën si një model refernce për qeverisjen e mirë, luftimin e korrupsionit, rritjen e transparencës dhe zhvillimin ekonomik, në Serbi diskursi mbetet i ngjyrosur me elemente nacionaliste. Sipas tij, Serbia ende nuk e ka arritur shkallën e duhur të demokracisë për të diskutuar për standarde të mirëfillta qeverisëse. Një peshë kyçe në fushatën në Serbi po luan edhe rasti i Milan Radoiçiqit, i kërkuar për terrorizëm, i cili bashkë me grupin e tij paramilitar dikur kontrollonte përmes Listës Serbe çështjet politike dhe të sigurisë në veri. Islami vlerëson se Kosova ka arritur të çmontojë dhe mposhtë këtë strukturë kriminale, e cila tashmë operon e strehuar në Serbi. Sipas tij, në Serbi kufiri mes shtetit dhe krimit është zbehur, pasi mekanizmat shtetërorë janë vënë në shërbim të individëve si Radoiçiq. Opozita serbe po i shfrytëzon këto lidhje mes pushtetit dhe grupeve kriminale për të sfiduar Vuçiqin, ndërsa ky i fundit vazhdon të mbrohet duke pretenduar se kundërshtarët e tij po ushqehen me argumente të ofruara nga kryeministri i Kosovës.