Rigjykimi i Endrit Nikës: Ish-recepsionistja tregon detajet e natës tragjike dhe reagimin e dyshimtë të të akuzuarit

Gjatë seancës së rigjykimit në Gjykatën Themelore në Prishtinë ndaj Endrit Nikës, ish-recepsionistja e hotelit “Sonoma”, Erza Limani, ka dëshmuar rreth rrethanave të ngjarjes fatale ku Maria Clara humbi jetën pasi ra nga dritarja e dhomës. Limani ka shpalosur detaje të reja nga ajo natë, duke përfshirë bisedën e zhvilluar me Nikën dhe reagimin e tij kur mori vesh për ardhjen e forcave të rendit. E ftuar për të dëshmuar, ish-punonjësja e hotelit ka shpjeguar se kishte qenë në orarin e ndërrimit të natës, i cili kishte nisur në orën 23:00. Sipas rrëfimit të saj, ajo kishte parë Endrit Nikën dhe viktimën duke hyrë në ambientet e hotelit pak pas mesnatës, duke shtuar se në sjelljen e tyre nuk kishte vërejtur asnjë shenjë dyshuese apo anormale. "I kam parë vetëm natën kritike, kur kanë ardhur në hotel. Pas një ose dy orësh ka ndodhur rasti. Kur kanë hyrë, i kam përshëndetur dhe kanë vazhduar në dhomë. Nuk kam vëregtur diçka në sjelljen e tyre që të dyshoja", ka deklaruar dëshmitarja para trupit gjykues. Më tej, ajo ka përshkruar momentin kur qetësia e natës u prish nga një zhurmë e fortë rreth orës 02:00 pas mesnate. Duke menduar se diçka e pazakontë kishte ndodhur, ajo kishte dalë menjëherë për të kontrolluar situatën. "Kam dëshmuar një krismë të madhe që më ka bërë të dal. E kam parë një vajzë në tokë, me xhama përreth saj, kornizën e dritares dhe patika", ka shtuar Limani, duke treguar skenën e rëndë që i ishte shfaqur para syve. Pas kësaj, ajo kishte njoftuar menjëherë Ramiz Nuhën, i cili ndodhej në katin e sipërm. Kur ajo ishte afruar pranë trupit të vajzës, ka vënë re se ajo ishte ende e gjallë dhe po kërkonte ujë. Sipas saj, në ato momente kishte arritur edhe Endrit Nika. "Kur kam shkuar te vajza, ajo ka qenë gjallë dhe ka kërkuar ujë. Kjo ka ndodhur para se të zbriste roja. Pastaj ka ardhur edhe Endriti. Unë e kisha një shishe ujë në dorë, por nuk ia kam dhënë vajzës. Ia kam dhënë Endritit, i cili ishte afër saj. Nuk e di nëse ia ka dhënë për të pirë apo ia ka lagur fytyrën", ka shtuar ajo në dëshminë e saj. Një nga pikat kyçe të dëshmisë ka qenë komunikimi i drejtpërdrejtë që Limani kishte pasur me Nikën menjëherë pas tragjedisë. Ajo ka treguar se ai i kishte thënë se ndodheshin në dhomën 403 dhe se nuk ishte në dijeni se si kishte përfunduar vajza duke rënë nga dritarja. "Endriti ka ardhur tek unë dhe ka filluar të më tregojë se si kishte ndodhur rasti. Më tha se kishin qenë duke fjetur në dhomën 403 dhe nuk e dinte se si kishte rënë vajza. Unë i kam thënë se nuk ka mundësi, sepse krevati është larg dritares", ka dëshmuar ish-recepsionistja, duke hedhur poshtë pretendimet e mundshme të një rrëzimi aksidental nga shtrati. Po ashtu, dëshmitarja ka bërë të publike sjelljen e tensionuar të Nikës në momentin kur ajo e kishte njoftuar se policia po vinte në vendin e ngjarjes. Sipas saj, ai kishte shfaqur nervozizëm të tejskajshëm dhe kishte nisur të përdorë fjalë fyese. "Kur i kam thënë se po vjen Policia, Endriti ka thënë: 'Jo, Policia jo Policia. Ka qenë nervoz dhe i tensionuar. Ka përdorur fjalë fyese dhe sharje, jo ndaj meje, por në përgjithësi. Jam ndier e frikësuar dhe jam larguar pak më tutje", ka shpjeguar ajo, duke shtuar po ashtu se gjatë zbritjes kishte vërejtur se këmisha e Nikut ishte e shqyer në pjesën e prapme. Në fund të dëshmisë është përmendur se roja i hotelit ishte ai që kishte njoftuar zyrtarisht autoritetet policore dhe ekipin mjekësor të emergjencës. Rigjykimi ndaj Endrit Nikës do të vazhdojë me dëgjimin e dëshmitarëve të tjerë dhe shqyrtimin e provave për të zbardhur plotësisht rrethanat e këtij rasti. Shënim: Të gjithë personat e përmendur në këtë artikull gëzojnë parimin e pafajësisë derisa fajësia e tyre të vërtetohet përfundimisht me vendim gjyqësor të formës së prerë.