Nata madhështore e Messit mbyllet me akuza: Benini denoncon sjelljen e Argjentinës pas ndeshjes

Ndihmëstrajneri i kombëtares së Beninit, Tonde Adelekoun, ka hedhur hije dyshimi mbi sjelljen e përfaqësueses së Argjentinës, duke ngritur akuza të forta për trajnimin që iu bë lojtarëve afrikanë pas ndeshjes së fundit të Lionel Messit si kampion bote. Përmes një deklarate publike, Adelekoun ka shfaqur keqardhje të thellë për atë që e ka quajtur ftohje dhe shpërfillje totale ndaj futbollistëve të Beninit, të cilët kishin bërë një rrugë të gjatë deri në Buenos Aires për të qenë të pranishëm në këtë ngjarje të madhe për yllin argjentinas. Sipas tij, delegacioni afrikan ishte sfilitur nga një udhëtim tejet i lodhshëm prej rreth 13 orësh fluturim nga Parisi në kryeqytetin argjentinas, pasi më parë kishin kaluar gjashtë orë të tjera nga Abidjani në Paris, pa llogaritur ndalesat e tjera gjatë itinerarit. Edhe pse e cilësoi duelin në fushë si një ngjarje të jashtëzakonshme, trajneri afrikan theksoi se pika e errët erdhi me rënien e fyellit të fundit, kur lojtarët e tij deshën thjesht t'i afroheshin Messit dhe t'i jepnin dorën pjesëtarëve të kombëtares argjenitase. “Ajo që më habiti ishte refuzimi kategorik dhe i qartë nga ana e ekipit të Argjentinës për të pasur ndonjë kontakt me ekipin tim pas ndeshjes”, është shprehur Adelekoun. Ai ka vënë në dukje se sigurimi privat ndërhyri menjëherë për të penguar çdo mundësi kontakti mes futbollistëve të Beninit dhe idhullit të tyre, duke shpërndarë me forcë edhe grupin e lojtarëve që ishin rreshtuar vetëm për ta duartrokitur atë. “Shpejtësia me të cilën burrat e sigurisë shpërndanë grupin e vogël të lojtarëve që ishin formuar ishte mbresëlënëse. Dukej sikur njerëzit e mi ishin një bandë në mes të një trazire”, shtoi më tej ai. Në rrëfimin e tij, Adelekoun nënvizoi se një trajtim i tillë ishte tejet zhgënjyes, veçanërisht duke pasur parasysh dashurinë dhe admirimin e madh që Messi gëzon në kontinentin afrikan, si dhe peshën e këtij momenti historik. Në mbyllje të reagimit të tij, ai bëri thirrje për më shumë respekt reciprok në sportin e futbollit, ndërkohë që këto akuza mbeten deri tani versioni zyrtar i palës nga Benini.