Përjashtimi i Bardhit dhe Balliut nga Kuvendi, Berisha: Urdhër direkt i Ramës, do të rivlerësojmë pozicionin tonë

Kryetari i Partisë Demokratike, Sali Berisha, ka drejtuar akuza të rënda ndaj kryeministrit Edi Rama, duke e bërë atë përgjegjës direkt për masën disiplinore që la deputetët opozitarë Gazment Bardhi dhe Klevis Balliu jashtë punimeve të Kuvendit për një periudhë 60-ditore. Duke folur para gazetarëve nga selia e Partisë Demokratike, lideri i opozitës e ka quajtur këtë sanksion si një akt arbitrar dhe haptazi antikushtetues, i cili sipas tij nuk mbështetet në asnjë dispozitë ligjore. Berisha shtoi se ky vendim dëshmon tentativën e ekzekutivit për të shkatërruar pluralizmin, për të mbyllur gojën e opozitës dhe për të shtypur të drejtën e protestës. “Sot Edi Rama urdhëroi, pa asnjë bazë ligjore, të përjashtojë kryetarin e grupit të Partisë Demokratike dhe nënkryetarin e komisionit të sigurisë, zotërinjtë Gazment Bardhi dhe Klevis Balliu, dy muaj nga parlamenti. Armik i egër i parlamentarizmit, i protestës dhe fjalës së lirë, Edi Rama me akte të tilla dëshmon se është një narko-diktator i urryer për shqiptarët”, u shpreh Berisha gjatë konferencës. Më tej, kreu i demokratëve bëri të ditur se kjo masë është hedhur poshtë me indinjatë nga forca politike që ai drejton, ndërsa paralajmëroi se deputetët e opozitës do të mblidhen në një tryezë urgjente për të vendosur mbi hapat dhe qëndrimin zyrtar që do të mbajnë në vijim. “Dënojmë me forcën më të madhe këtë vendim antiligjor, antikushtetues, kryekëput të pabazë. Natyrisht, grupi parlamentar do mblidhet të shqyrtojë qëndrimet përkatëse ndaj këtij vendimit”, përfundoi deklaratën e tij kryetari i PD-së, Sali Berisha.