Prapaskenat e heqjes së sanksioneve: Dodik zbulon kërkesën ndaj administratës Trump për largimin e Schmidtit

Udhëheqësi i Republikës Srpska, Milorad Dodik, ka bërë publike detaje nga bisedimet e zhvilluara me administratën amerikane, gjatë të cilave ai pretendon se ka kushtëzuar heqjen e sanksioneve ndaj tij me shkarkimin e Christian Schmidtit nga posti i Përfaqësuesit të Lartë në Bosnjë dhe Hercegovinë. Gjatë një paraqitjeje në Radio Televizionin e Serbisë (RTS), ai bëri të ditur se autoritetet e Shteteve e Bashkuara i kishin kërkuar anulimin e dy apo tri statuteve të Republikës Srpska, të cilat më herët ishin shpallur jokushtetuese nga Gjykata Kushtetuese e Bosnjë dhe Hercegovinës. Sipas rrëfimit të tij, megjithëse kishte shprehur gatishmërinë për të plotësuar këtë kërkesë, ai kishte kërkuar ndërhyrje shtesë nga Uashingtoni. "Thashë: ‘Në rregull, betohem se kjo është shumë pak nga ana juaj’", u shpreh ai, ndërsa në pyetjen se cili ishte kushti i tij shtesë, ai tha se ishte përgjigjur: "Largojeni këtë Schmidt". Kur u pyet nëse pala amerikane kishte vepruar bazuar në kërkesën e tij, Dodik fillimisht u shpreh se nuk e di nëse është dëgjuar, por shtoi se situata kishte ndryshuar në terren. Më vonë, ai sqaroi se nuk besonte në një ndikim të drejtpërdrejtë, por se thjesht ishin krijuar rrethanat e përshtatshme. Politikani serb i Bosnjës gjithashtu pretendoi se gjatë një vizite në SHBA, Schmidtit i ishte kumtuar përfundimi i misionit të tij dhe nevoja për t'u kthyer në Gjermani, ndërsa gjatë intervistës nuk përmendi emra specifikë zyrtarësh e as nuk ofroi dokumente dëshmuese për pretendimet e ngritura. Kujtojmë se më 29 tetor 2025, Departamenti i Thesarit i SHBA-së vendosi të tërheqë nga lista e zezë vetë Dodikun, anëtarët e familjes së tij, bashkëpunëtorët e ngushtë politikë, si dhe subjektet afariste që lidheshin me ta. Sanksionet fillestare ndaj tij ishin vendosur në vitin 2017 për shkak të pengimit të Marrëveshjes së Dejtonit, ndërsa vala e dytë e masave erdhi në vitin 2022 për korrupsion dhe veprime cenuese ndaj institucioneve qendrore boshnjake. Ky zhvillim pasoi një sërë vendimesh të Asamblesë Kombëtare të Republikës Srpska, e cila emëroi një udhëheqës të përkohshëm pas largimit të Dodikut dhe shfuqizoi një paketë ligjesh që sfidonin rendin shtetëror. Departamenti i Shtetit i SHBA-së i përshëndeti këto lëvizje si një kontribut për qetësimin e situatës, ndërsa Zyra për Kontrollin e Aseteve të Huaja (OFAC) nuk ofroi sqarime mbi arsyet e faljes. Më pas, në muajin maj të vitit 2026, Schmidt njoftoi dorëheqjen, duke e paraqitur fillimisht si vendim personal, por vetëm pak javë më vonë, në një deklaratë për gazetën gjermane Augsburger Allgemeine, ai pranoi se kishte hasur në presion të fortë nga Uashingtoni për të lënë detyrën më herët se ç'kishte parashikuar.