A do të jetë presidentja e re çelësi për lirinë e Hashim Thaçit?

Në orët e para të 7 tetorit, Kosova u bë me presidente të re, ndërsa atmosfera festive në sallën e Kuvendit ishte më se e dukshme, veçanërisht në radhët e Partisë Demokratike të Kosovës (PDK). Aty u panë përshëndetje të ngrohta dhe përqafime, mes të cilëve u dallua ai i Elmi Reçicës, ish-zëvendësshefit të SHIK-ut. Gëzimi për zgjedhjen e kreut të ri të shtetit kishte një prapaskenë domethënëse. Si kusht kyç për sigurimin e votave të PDK-së, Kuvendi votoi ndryshimet në ligjin për Dhomat e Specializuara, i cili përfshin një dispozitë që mund t'i hapë rrugë faljeve presidenciale për të dënuarit në Hagë. Kjo do të thotë se presidentja e sapozgjedhur, e cila u prit me aq entuziazëm, mund të jetë ajo që në të ardhmen do të shqyrtojë kërkesën për faljen e Hashim Thaçit. Kjo dilemë nuk është thjesht një provokim, por një pyetje që me gjasë ka kaluar në mendjet e të gjithë atyre që festuan atë natë. PDK-ja nuk e ka fshehur kurrë synimin e saj. Pas vendimit gjyqësor të 16 shtatorit, kjo parti dorëzoi ndryshimet ligjore dhe kërkoi shqyrtimin e tyre para zgjedhjes së presidentit, duke e shfrytëzuar kreun e shtetit si monedhë shkëmbimi për një çështje që prek drejtpërdrejt fatin e ish-liderëve të saj të dënuar. Edhe pse kryeministri Albin Kurti kishte ofruar mundësi të tjera komprisi, kreu i PDK-së, Bedri Hamza, i refuzoi ato derisa në tavolinë u vu emri i Justina Shiroka Pulës, ish-ministre dhe ish-deputete e kësaj partie. Negociatat janë pjesë e politikës, por përdorimi i institucionit më të lartë të vendit si peng për interesa partiace ka ngritur shqetësime serioze. Në debatin publik mbi Gjykatën Speciale, shpesh flitet më shumë për fatin e të dënuarve sesa për viktimat. Më 16 shtator, gjykata shpalli fajtorë Hashim Thaçin, Kadri Veselin, Jakup Krasniqin dhe Rexhep Selimin për krime lufte dhe krime të tjera, duke i dënuar me gjithsej 81 vjet burgim, nga të cilat 25 vetëm për Thaçin. Ndonëse u shpallën të pafajshëm për krime kundër njerëzimit, dënimi mbetet i rëndë për shkak të përgjegjësisë në dhjetëra raste vrasjesh, ndonëse aktgjykimi është i shkallës së parë dhe i nënshtrohet ankesave në apel. Sipas aktgjykimit, ndër viktimat kishte edhe shqiptarë të Kosovës që mbështetnin rrugë alternative politike, si Lidhja Demokratike e Kosovës (LDK) e Ibrahim Rugovës. Gjykatësit konstatuan se drejtuesit e UÇK-së kishin si qëllim shënjestrimin e kundërshtarëve politikë, ndërsa Thaçi u gjet personalisht përgjegjës për arrestimin dhe marrjen në pyetje të 13 parlamentarëve, ku rasti i Behajdin Allaqit mbetet ndër më të dhimbshmit.