Tentativë kontrabande nga Turqia, Dogana kap mallra të padeklaruara në Han të Elezit

Autoritetet e Doganës së Kosovës kanë sekuestruar sasi mallrash të padeklaruara, të cilat po transportoheshin me një autobus që vinte nga Turqia. Zbulimi është bërë gjatë procedurave standarde të kontrollit në Pikën e Kalimit Kufitar në Han të Elezit. Gjatë inspektimit të detajuar të hapësirave të brendshme dhe zonës së bagazheve, zyrtarët doganorë kanë konstatuar praninë e mallrave të fshehura përgjatë korridorit të mjetit të transportit. Sipas informacionit zyrtar nga Dogana, përveç mungesës së deklarimit, për produktet e kapura është verifikuar gjithashtu shkelje e legjislacionit që rregullon të drejtat e pronësisë intelektuale. Përpara nisjes së kontrollit fizik, si drejtuesi i mjetit ashtu edhe udhëtarët ishin pyetur zyrtarisht nëse kishin për të deklaruar ndonjë mall apo vlerë monetare, mirëpo ata kishin mohuar duke mos paraqitur asgjë para autoriteteve.