Ministri Maqedonci paralajmëron në arenën ndërkombëtare: Serbia po synon destabilizimin e Kosovës

Ministri i Mbrojtjes i Republikës së Kosovës, Ejup Maqedonci, gjatë një interviste për platformën e njohur ndërkombëtare “Talking with TVP world”, ka ngritur alarmin mbi rrezikun e vazhdueshëm që Serbia i kanoset vendit dhe tendencave të saj për të prishur qetësinë rajonale. Gjatë prononcimit të tij, kreu i mbrojtjes ka bërë të qartë se frika kryesore e autoriteteve kosovare mbetet skenari i një ndërhyrjeje të mundshme nga ana e Beogradit, bashkë me rrezikun e theksuar të aneksimit të territoreve, zhvillime këto që do të mund të përmbysnin sigurinë në të gjithë Ballkanin Perëndimor. Po ashtu, Maqedonci ka tërhequr vëmendjen edhe ndaj lidhjeve të ngushta ekzistuese ndërmjet Serbisë dhe Federatës Ruse, duke i analizuar këto raporte në kuadër të sfidave dhe rreziqeve reale që i kanosen paqes dhe stabilitetit në rajon.