Tragjedi në Gjilan: Babai dyshohet se qëlloi për vdekje djalin e tij 29-vjeçar, arratiset pas krimit

Një ngjarje e rëndë ka tronditur mbrëmjen e së dielës fshatin Pogragjë të Gjilanit, ku një i ri ka rënë viktimë e një krimi brenda familjes, ndërsa autori i dyshuar është në arrati. Rasti u konfirmua nga Policia e Kosovës, e cila njoftoi se viktima e kësaj tragjedie është e lindur në vitin 1997. Zëdhënësi i Policisë për rajonin e Gjilanit, Valon Osmani, bëri të ditur se alarmi për të shtëna me armë zjarri është pranuar rreth orës 19:30, më 11 tetor 2026. "Menjëherë pas pranimit të informatës, në vendin e ngjarjes kanë dalë njësitë përkatëse policore dhe Prokurori i Shtetit", ka deklaruar Osmani. Sipas të dhënave të para nga terreni, trupi i pajetë i viktimës i përket gjinisë mashkullore, ndërsa ekipi mjekësor i prezenstuar në vendngjarje ka konstatuar vetëm vdekjen e tij. Ndërkohë, autoritetet po kërkojnë me ngulm një person të dyshuar, gjithashtu shtetas kosovar dhe i njohur për organet e rendit, i cili dyshohet se është larguar menjëherë në drejtim të panjohur pas kryerjes së veprës penale. Aktualisht, Policia e Kosovës, në bashkëpunim të ngushtë me Prokurorin e Shtetit dhe njësitë e specializuara hetimore, po vijon operacionet intensive për lokalizimin, kapjen e të dyshuarit dhe zbardhjen e plotë të motiveve dhe rrethanave që çuan në këtë ngjarje tragjike.