Vllaznia merr fitoren vendimtare, Murataj: Ja si ndryshoi skuadra me trajnerin e ri

Goditja fantastike nga distanca e Edon Muratajit në minutën e 31-të ka qenë vendimtare për triumfin e Vllaznisë përballë Dinamos, një sfidë e zhvilluar në kuadër të javës së gjashtë të Abissnet Superiores. Pas përfundimit të ndeshjes, autori i eurogolit ka dhënë një deklaratë për mediat, ku ndër të tjera ka lënë të kuptohet se atmosfera dhe qasja në skuadër kanë ndryshuar ndjeshëm pas largimit të ish-trajnerit Edi Martini. “Mendoj se u përgatitëm në mënyrën më të mirë të mundshme ndaj Dinamos dhe stafi teknik gjeti qasjen e duhur te grupi. Sot treguam unitet dhe luajtëm si një bllok i vetëm. Fatmirësisht arritëm triumfin, pasi në këtë pikë të kampionatit 3 pikët janë prioritet mbi çdo gjë tjetër”, u shpreh mesfushori ofensiv. Më tej, Murataj theksoi se prurja e re në krye të pankinës i ka dhuruar një impuls tjetër ambientit shkodran, duke sjellë entuziazëm dhe dëshirë të madhe për të luftuar në fushën e blertë. “Tekniku i ri ka zbritur në fushë me një valë të fortë pozitiviteti. Ai ka instaluar një mentalitet ndryshe në grup. Zbritëm në fushë me grintë maksimale dhe me qëllimin e qartë për të fituar çdo duel, diçka që u reflektua qartësisht edhe gjatë 90 minutave të lojës”, përfundoi mesfushori i Vllaznisë.