Edon Zhegrova shkëlqen si zëvendësues, Juventusi i rrëmben një pikë Cagliarit në Serie A

Juventusi është detyruar të mjaftohet me një barazim 1:1 në udhëtim ndaj Cagliarit, në kuadër të xhiros së gjashtë të kampionatit italian, Serie A. Futbollisti i Përfaqësueses së Kosovës, Edon Zhegrova, u hodh në fushë me fillimin e pjesës së dytë, nga minuta e 46-të, dhe u shndërrua menjëherë në rrezikun kryesor për mbrojtjen vendase, duke ndërtuar disa aksione premtuese për gol. Pjesa e parë foli për vendasit, pasi në minutën e 20-të, Paul Mendy dhuroi një asistim inteligjent brenda zonës për Daniel Maldinin. Ky i fundit nuk gaboi dhe me një goditje të saktë tokazi në mes të portës zhbllokoi shifrat, duke kaluar Cagliarin në epërsi prej 1:0. Me nisjen e fraksionit të dytë, hyrja e Zhegrovës solli dinamikë të re. Në minutën e 52-të, ylli kosovar përfitoi nga një gabim në pasim në hyrje të zonës dhe lëshoi një gjuajtje drejt kuadratit, e cila u neutralizua mrekullisht nga portieri Elia Caprile. Presioni i sulmuesit të krahut vazhdoi në minutën e 60-të, kur pas pranimit të një topit të gjatë në thellësi, ai gjeti hapësirën e duhur dhe lëshoi një predhë nga distanca që përfundoi ngjitur me shtyllën e djathtë. Vetëm dy minuta më vonë, në të 62-tën, përfaqësuesi kosovar provoi sërish fatin me një goditje të tokësqe nga distanca, por Caprile doli sërish fitues me një tjetër pritje vendimtare. Zhegrova nuk u ndal as në minutën e 64-t, duke gjuajtur nga skaji i zonës, por pa rrezik për portierin e Cagliarit. Këmbëngulja e pandërprerë e Zhegrovës vazhdoi deri në minutën e 80-të, kur ai provoi edhe një herë fuqishëm drejt qendrës së portës, por Caprile tregojë vëmendje maksimale duke e ndalur përsëri. Megjithatë, vrulli i “Zonjës së Vjetër” u shpërblye në minutën e 81-të. Pas një krosimi perfekt në zonë, Randal Kolo Muani u tregua i saktë me kokë, duke e dërguar topin afër shtyllës së djathtë dhe duke vendosur ekuilibrin në 1:1. Biaranca e rezultatit ishte shumë pranë pesë minuta më vonë, kur po i njëjti Kolo Muani lëshoi një predhë të vërtetë nga skaji i zonës së rreptësisë, e cila u ndal fatkeqësisht nga traversa. Pas këtij barazimi, Cagliari pozicionohet në shkallën e katërt të tabelës me 13 pikë të grumbulluara, ndërsa Juventusi stacionohet në vendin e gjashtë me 11 pikë në llogarinë e tij.