Tragjedi në Gjilan: I riu qëllet për vdekje me armë zjarri në Pogragjë, dyshuari në arrati

Një ngjarje e rëndë ka tronditur mbrëmjen e sotme fshatin Pogragjë të Gjilanit, ku një 29-vjeçar ka rënë viktimë e një sulmi me armë zjarri. Zëdhënësi i Policisë së Kosovës për rajonin e Gjilanit, Valon Osmani, ka njoftuar se rreth orës 19:30 autoritetet kanë pranuar një thirrje alarmi për të shtëna armësh në këtë zonë. "Menjëherë pas pranimit të informatës, në vendin e ngjarjes kanë dalë njësitë përkatëse policore dhe Prokurori i Shtetit. Sipas informatave fillestare dyshohet se si pasojë e të shtënave me armë zjarri ka humbur jetën një person i gjinisë mashkullore i lindur në vitin 1997. Vdekjen e viktimës në vendin e ngjarjes e ka konstatuar ekipi mjekësor", ka deklaruar ai. Forcat e rendit janë vënë në ndjekje të autorit të dyshuar, një shtetas kosovar i njohur për organet e zbatimit të ligjit, i cili është arratisur menjëherë pas kryerjes së krimit. Aktualisht, Policia e Kosovës, në bashkëpunim të ngushtë me Prokurorin e Shtetit dhe njësitë e specializuara hetimore, po zbaton një sërë veprimesh intensive operative dhe hetimore për kapjen e të dyshuarit dhe zbardhjen e plotë të motiveve dhe rrethanave të kësaj ngjarjeje tragjike.