Skandali me videot intime/ Sociologia Dhamo: Shoqëria shqiptare dështoi, shkelëm rëndë privatësinë e artistëve

E ftuar në edicionin e kësaj të diele në emisionin “Review” me moderatoren Greta Topjana, sociologia dhe pedagogia Eris Dhamo ka analizuar reagimin e publikut pas publikimit të disa videove intime të artistëve në rrjetet sociale, si dhe ndikimin e teknologjisë në këtë dinamikë. Gjatë diskutimit, Dhamo vuri në dukje se reagimi i opinionit publik ishte i papranueshëm, duke nënvizuar se u shkelën normat themelore të moralit dhe etikës njerëzore. Sipas saj, vëmendja masive e qytetarëve në platformat online dhe në bisedat private u orientua gabimisht drejt jetës personale të figurave të njohura, në vend që të analizohej fenomeni i shpërndarjes së pamjeve. “Pa u ndalur tek ngjarja në vetvete, fokusi ynë duhet të jetë te mënyra se si ne si individë reagojmë ndaj situatave të tilla. Në një pamje të përgjithshme, reagimi i shoqërisë sonë ishte tejet i gabuar”, deklaroi ajo. Më tej, pedagogja shtoi se kufijtë etikë u kapërcyen hapur, duke theksuar se edhe pse kurioziteti mbetet një tipar njerëzor, mungoi ndjeshmëria dhe empatia për të mos cënuar dinjitetin njerëzor. Ajo kritikoi faktin se diskursi publik u katandis në gjykime morale ndaj jetës private, në vend që të mbrohej shenjtësia e privatësisë. “Diskursi ynë shoqëror nuk përputhej me vlerat morale dhe etike të një shoqërie të qytetëruar. Ne nuk diskutuam rëndësinë e ruajtjes së privatësisë dhe as nuk kërkuam shkakun e vërtetë se pse këto materiale u shpërndarë masivisht, por u lamë pasionit për të fajësuar individët për zgjedhjet e tyre”, përfundoi Dhamo.