Shpërthimi me tritol në Gjirokastër: Zbardhen detaje të reja dhe pistat e hetimit për atentatin ku ndërroi jetë Beqir Devolli

Grupi hetues ka hedhur dritë mbi rrethanat e ngjarjes së rëndë të regjistruar mbrëmjen e 10 tetorit 2026, rreth orës 22:00, në bulevardin “18 Shtatori” në Gjirokastër, pranë Gjykatës dhe Drejtorisë Vendore të Policisë. Si pasojë e një shpërthimi të fuqishëm me lëndë plasëse në një automjet në lëvizje tip “Mercedes-Benz”, humbi jetën drejtuesi i mjetit, Beqir Devolli, ndërsa mbeti i plagosur pasagjeri Erigers Mela, 26 vjeç. Sipas të dhënave të siguruara nga hetimet, i riu Mela është djali i një ish-prokurori të Gjirokastrës, ndërsa nëna e tij, Mimoza Mela, ushtron detyrën e sekretares pranë Prokurorisë. Ky detaj ka bërë që autoritetet të orientojnë hetimet drejt pistës së një hakmarrjeje të mundshme për shkak të dosjeve të kaluara të trajtuara nga ish-magistrati. Nga ana tjetër, grupi i punës po shqyrton me kujdes edhe pistën e konflikteve të mundshme personale. Dyshohet se në pjesën e poshtme të makinës ishte montuar një sasi prej rreth 300 gramë tritol, e cila u aktivizua gjatë lëvizjes së automjetit. Përveç pistave të motiveve, hetuesit po punojnë intesivisht për të zbuluar se cili ka qenë objektivi i vërtetë i këtij atentati, Beqir Devolli apo Erigers Mela. Dëshmia e 26-vjeçarit pritet të jetë kyç për të hedhur dritë mbi dinamikën dhe autorët e kësaj ngjarjeje kriminale. Pas shpërthimit shkatërrues, automjeti ka humbur kontrollin duke u përplasur me trafikndarësen, ndërsa dëmtimet më të rënda janë regjistruar në pjesën e sipërme dhe në dyert e mjetit. Të plagosurit u transportuan fillimisht në spitalin e qytetit të Gjirokastrës. Për shkak të gjendjes kritike për jetën, Beqir Devolli u nis me urgjencë drejt Spitalit të Traumës në Tiranë, por fatkeqësisht ndërroi jetë gjatë rrugës. Ndërkohë, 26-vjeçari Erigers Mela fatmirësisht ndodhet jashtë rrezikut për jetën.