Tragjedi nga uji në Nepal: Pesë të zhdukur dhe dhjetëra banesa të shkatërruara nga vërshimet

Një valë përmbytjesh të papritura ka goditur ditën e djeshme zonën qendrore të Nepalit, duke shkaktuar pasoja të rënda materiale dhe duke lënë pas pesë persona të zhdukur. Kjo ngjarje tragjike vjen vetëm pak javë pasi vendi u përball me vërshime shkatërruese që i morën jetën qindra qytetarëve. Sipas njoftimeve zyrtare, goditja më e fortë u regjistrua në distriktin Gorkha. Një masë e madhe uji, e përzier me baltë dhe mbeturina të shumta, vërshoi mbi zonat e banuara duke rrafshuar dhjetëra shtëpi në rrugën e saj. Kreu i agjencisë kombëtare për fatkeqësitë natyrore, Dharam Raj Uprety, ka shpjeguar se incidenti dyshohet të ketë ndodhur si pasojë e bllokimit të lumit nga një rrëshqitje dheu, e cila më vonë ka ceduar, duke liruar një sasi kolosale uji në natyrë. “Pesë persona janë të zhdukur”, ka konfirmuar zyrtarisht Uprety. Referuar bilancit paraprak, rreth 45 banesa janë shkatërruar plotësisht nga rrjedha e furishme. Dëmet janë shtrirë edhe në infrastrukturë, ku janë dëmtuar katër ura dhe tri projekte hidroelektrike, duke paralizuar kështu lëvizjen dhe duke vështirësuar ndërhyrjen e njësive të shpëtimit. Autoritetet lokale bëjnë me dijení se deri më tani janë evakuuar dhe shpëtuar të paktën 82 persona nga zonat e rrezikuara, mes të cilëve edhe nëntë shtetas të huaj. Për të përshpejtuar aksionet e kërkimit dhe të evakuimit, autoritetet kanë vënë në dispozicion katër helikopterë që operojnë pandërprerë në terren. Ndërkohë, frika nga përmbytje të reja mbetet e lartë, pasi niveli i ujit në lumin Budhi Gandaki vazhdon të ngrihet. Përpara se fatkeqësia të ndodhte, institucionet kishin lëshuar një alarm, duke u bërë thirrje urgjente banorëve që të braktisnin brigjet e lumenjve dhe të kërkonin strehim në vende më të larta e të sigurta. Aktualisht, ekipet e emergjencës po vazhdojnë operacionet intensive në terren, ndërsa bilanci i plotë i dëmeve të shkaktuara nga ky fenomen natyror mbetet ende për t'u përcaktuar saktësisht.