Fabregas zbulon sekretin: Si u frymëzova nga Interi për të neutralizuar skemat e Romës

Cesc Fabregas ka pranuar se strategjia e tij taktike për të ndalur formacionin e drejtuar nga Gian Piero Gasperini u bazua tek ajo çfarë bëri më parë Interi, teksa shprehu gjithashtu zhgënjimin që skuadra e tij nuk arriti të siguronte tri pikët e plota ndaj një kundërshtari që mbeti me dhjetë lojtarë. Pavarësisht se bëhet fjalë për dy nga ekipet më sulmuese në elitën e futbollit italian, sfida e zhvilluar në “Stadio Sinigaglia” prodhoi barazimin e parë pa gola në këtë edicion të Serie A, duke thyer një serë prej 53 ndeshjesh radhazi ku të paktën njëra skuadër kishte gjetur rrugën e rrjetës. Raste për shënim nuk munguan, ku veçohet goditja e shtyllës nga Lorenzo Pellegrini dhe pritjet vendimtare të portierit Pierluigi Gollini përballë Nico Paz. “Ndonjëherë futbolli është vërtet i pashpjegueshëm. Është e pazakontë të shohësh dy skuadra kaq pozitive dhe sulmuese të luajnë një ndeshje që mbyllet 0-0”, u shpreh trajneri Fabregas për “DAZN Italia” pas përfundimit të sfidës. Sipas tij, përballja me ekipin kryeqytetas kërkon guxim të madh dhe personalitet në fushë, pasi nëse një trajner fokusohet vetëm te aspekti mbrojtës pa guxuar të luajë me topin, është e pamundur të marrësh rezultat pozitiv. Ai e cilësoi paraqitjen e pjesës së parë si njërën ndër më të mirat e karrierës së tij si trajner kundër Romës, duke mos fshirë keqardhjen për mungesën e fitores. Gjatë takimit pati disa episode të diskutueshme, përfshirë një kërkesë nga zikaltrit për karton të kuq në fund të pjesës së parë, si dhe ndëshkimin me karton të kuq të drejtpërdrejtë të Donyell Malen në minutën e 53-të për një ndërhyrje të ashpër ndaj Bruno Kaikit. Edhe pse me një lojtar më pak në fushë, kryeqytetasit u treguan të fortë në prapavijë për të siguruar një pikë të rëndësishme jashtë fushe. “Nuk e shfrytëzuam siç duhet epërsinë numerike në fushë, duke përfshirë edhe zotërimin e topit, pasi na duhej më shumë durim dhe qarkullim më i shpejtë i sferës. Gjithsesi, ky është një ekip i ri dhe arriti të menaxhojë mirë situatat e rrezikshme të kundërsulmit, gjë që mbetet një aspekt pozitiv”, shtoi ai. Një tjetër ngjarje e pazakontë e ndeshjes ishte zëvendësimi i gjyqtarit kryesor në 20 minutat e fundit të sfidës, pasi Michael Fabbri pësoi një dëmtim në gju dhe ia la vendin gjyqtarit të katërt, Simone Sozza. Në aspektin e zgjedhjeve të formacionit, Fabregas vendosi të bëjë disa lëvizje surprizë, duke i besuar fanellën e titullarit Maxence Caqueret në dëm të Martin Baturinës. “Lojtarët shpesh meritojnë më shumë, ndaj pavarësisht skemës taktike, ai e meritonte të ishte që në fillim në fushë. Caqueret nuk është në listën tonë të Ligës së Kampionëve, por është stërvitur shkëlqyeshëm dhe e pashë të arsyeshme ta aktivizoja”, sqaroi spanjolli. Në fund, trajneri i skuadrës nga Como tregoi se nga u frymëzua për të përgatitur këtë ndeshje, duke vënë theksin te ndeshjet e kaluara të kampionatit. “Sipas mendimit tim, skuadra që i shkaktoi më shumë dëm Gasperinit ishte Interi i drejtuar nga Simone Inzaghi. Aty nisa të studioj disa detaje të caktuara dhe të marr ide për ndeshjen tonë”, përfundoi Fabregas.