Pas gjashtë vitesh pauzë, Clarence Seedorf merr frenat e skuadrës braziliane Corinthians

Pas një mungese prej gjashtë vitesh larg fushës së blertë dhe bankinave, Clarence Seedorf është rikthyer zyrtarisht në rolin e trajnerit, duke marrë drejtimin e klubit të njohur brazilian, Corinthians. Ish-mesfushori i shquar i Real Madridit dhe një ndër figurat më ikonike të gjeneratës së tij ka zvendësuar Fernando Dinizin në krye të kësaj skuadre, ndërsa ka firmosur një marrëveshje që e mban të lidhur me klubin deri në përfundim të vitit 2027. Në moshën 50-vjeçare, holandezi ka qenë i papunë që prej korrikut të vitit 2019, kohë kur u largua nga pozita e përzgjedhësit të Kombëtares së Kamerunit. “Pranimi i kësaj sfide është një nder, por edhe një përgjegjësi e madhe. Jam këtu për të dhënë gjithçka dhe për të ndërtuar një ekip që lufton për çdo top, çdo minutë dhe çdo fitore”, është shprehur Seedorf pas zyrtarizimit. Gjatë karrierës së tij si trajner, Seedorf ka krijuar një përvojë ndërkombëtare, duke drejtuar klube në Itali dhe Kinë, si Milanin në vitin 2014 dhe Shenzhen FC në vitin 2016, ndërsa në vitin 2018 ishte në krye të Deportivo La Coruñas. Megjithatë, mbështetësit e klubit brazilian do të duhet të tregojnë pak durim para se ta shohin teknikun e ri nga afër. Seedorf do të udhëtojë drejt Brazilit gjatë ditëve në vijim, çka do të thotë se ai nuk do të jetë në stol për sfidën e madhe derbi kundër Palmeirasit. Te skuadra e re, strategu holandez do të ketë mundësinë të punojë me futbollistë të njohur ndërkombëtarisht, siç janë Jesse Lingard dhe bashkëkombësi i tij, Memphis Depay. Vlen të theksohet se rrugëtimi i tij drejt kësaj ane nuk ka qenë pa konkurrencë, pasi drejtuesit e klubit kishin shqyrtuar një listë të gjerë emrash përpara se të vendosnin për Seedorf, ku përfshiheshin figura si Ramón Díaz, Juan Pablo Vojvoda, Carille, Luis Zubeldía, Sylvinho dhe Javier Mascherano.