I fshehur për një çerek shekulli në SHBA, kapet 52-vjeçari shqiptar i dënuar për trefish vrasje në Shkodër

Autoritetet në New York të Shteteve të Bashkuara të Amerikës kanë prangosur 52-vjeçarin shqiptar Valentin Ftoni, i cili mbante mbi vete dy vendime gjyqësore me nga 25 vite heqje lirie secili, për tri vrasje të ndodhura në qarkun e Shkodrës. Ai figuronte në listën e personave të shpallur në kërkim ndërkombëtar që prej vitit 2001. Sipas të dhënave zyrtare nga Policia e Shtetit, ky operacion i suksesshëm u finalizua pas një hetimi intensiv dhe një bashkëpunimi të ngushtë midis strukturave vendase dhe tri agjencive kryesore federale amerikane: DSS/OCIU, Shërbimit të Marshallëve të SHBA-së (USMS) dhe Agjencisë së Emigracionit dhe Doganave (ICE). Gjatë verifikimeve hetimore, ka rezultuar se pas arratisjes nga Shqipëria, Ftoni kishte shfrytëzuar dokumente të falsifikuara dhe disa emra të ndryshëm për të depërtuar dhe siguruar strehim brenda shtetit amerikan. Dy dënime me nga 25 vite burgim Në datën 28 shtator 2001, Gjykata e Rrethit Gjyqësor Shkodër e shpalli fajtor dhe e dënoi me 25 vite burg Valentin Ftonin për eliminimin me paramendim të Gjelosh dhe Ardiana Markajt. Krimi i rëndë kishte ndodhur më 19 shtator 2000, në fshatin Ças të Velipojës, për motive hakmarrjeje. Më pas, në datën 18 nëntor 2008, e njëjta shkallë gjyqësore e dënoi sërish me 25 vite burgim lidhur me vrasjen e shtetasit Gac Toma, e cila ishte kryer më 12 gusht 2001. Krahas akuzave për vrasje me paramendim, ndaj tij rëndonin gjithashtu vendime gjyqësore për veprën penale të prodhimit dhe mbajtjes pa leje të armëve zjarrit, armëve shpërthyese dhe municioneve luftarake. Pritet ekstradimi drejt Shqipërisë Drejtoria e Policisë së Shtetit bëri me dije se po vijojnë kontaktet dhe hapat koordinues me homologët amerikanë për të mbyllur procedurat e ekstradimit të 52-vjeçarit drejt vendit tonë, ku ai do të duhet të shlyejë dënimet e caktuara nga gjykatat shqiptare. Në njoftim u theksua rëndësia e partneritetit me Ambasadën e SHBA-së në Tiranë dhe agjencitë ligjzbatuese amerikane, duke e vlerësuar këtë ndërhyrje si një dëshmi të qartë të bashkëpunimit ndërkombëtar në fushën e sigurisë dhe luftës kundër krimit.