Kalendari i mbingarkuar dhe Liga e Kombeve, Uli Hoeness lëshon akuza të forta ndaj UEFA-s

Presidenti i nderit i Bayern Munichut, Uli Hoeness, ka drejtuar kritika të ashpra në drejtim të kalendarit ndërkombëtar të ndeshjeve, duke vënë theksin te dëmet që po i shkaktohen skuadrës bavareze nga ngarkesa e tepërt e futbollistëve. Sipas drejtuesit të njohur, giganti gjerman është ndër klubet më të dëmtuara nga pasojat e Kampionatit Botëror dhe ndërprerjet e shpeshta për shkak të angazhimeve të kombëtareve, të cilat kanë ndikuar negativisht në ecurinë e fillimit të sezonit. Gjatë një paraqitjeje për mediumin “Bild TV”, Hoeness u tregua mjaft kritik ndaj strukturave drejtuese të futbollit botëror dhe evropian, duke u shprehur se klubi i tij po mban barrën kryesore të këtyre vendimeve. “Ne jemi viktimat më të mëdha të këtij Kampionati Botëror kaq të gjatë. Lojtarët tanë u kthyen shumë vonë dhe menjëherë iu desh të shkonin në pushime”, u shpreh ai, duke përmendur emra si Harry Kane dhe Michael Olise, të cilët ishin të angazhuar deri në fazat e fundit të turneut. Situata është komplikuar edhe më tej nga fakti se, pasi edicioni i ri i klubeve nisi më 28 gusht, kalendari u desh të ndërpritej sërish për shkak të grumbullimeve të përfaqësueseve kombëtare, një situatë që Hoeness e cilëson të papranueshme. Veçanërisht, 74-vjeçari ka vënë në shënjestër Ligën e Kombeve të organizuar nga UEFA, duke e konsideruar ndërprerjen e kampionatit si një goditje të rëndë për ritmin e skuadrës. “Vendimin e UEFA-s për të vendosur një ndërprerje dyjavore vetëm katër javë pas fillimit të Bundesligës e konsideroj një katastrofë të vërtetë. Plot 18 futbollistë tanë ishin me kombëtaret dhe është normale që në këto kushte të humbasësh ritmin”, deklaroi ai. Aktualisht, Bayern Munich po garon për kreun e tabelës, duke qenë dy pikë prapa skuadrës udhëheqëse në Bundesligë, ndërsa Hoeness insiston se institucionet e futbollit duhet të reflektojnë, duke kujtuar se janë klubet ato që mbajnë barrën financiare të pagave të lojtarëve. “Klubet më në fund duhet të luftojnë për interesat e tyre. Dhe futja e një gare kaq qesharake si Liga e Kombeve është shakaja e vitit”, përfundoi ai. Këto deklarata kanë gjetur mbështetje të plotë edhe nga presidenti aktual i Bayernit, Herbert Hainer, i cili ka dalë në mbrojtje të qëndrimit të bashkëpunëtorit të tij. “Uli Hoeness ka plotësisht të drejtë. Besoj se asnjë skuadër tjetër në Bundesligë, por as në arenën ndërkombëtare, nuk është e ngarkuar aq shumë sa ne. Pothuajse të gjithë lojtarët tanë janë përfaqësues të kombëtareve dhe e kanë kaluar gjithë verën me ekipet e tyre përfaqësuese”, theksoi Hainer, duke shtuar se udhëtimet e vazhdueshme dhe ndeshjet e Ligës së Kombeve po ndikojnë negativisht te lodhja e sportistëve profesionistë.