Viti në zi: Të afërm dhe qytetarë përcjellin për në banesën e fundit vëlla e motër Bogujevci

Në një atmosferë zie dhe dhimbjeje të thellë, qindra qytetarë dhe anëtarë të familjes janë mbledhur sot në fshatin Pozheran të Vitisë për t'i dhënë lamtumirën e fundit Egzon dhe Nafije Bogujevcit. Ngjarja tragjike, e cila tronditi opinionin publik, ndodhi mesditën e së premtes, rreth orës 14:26, në fshatin Livoç i Ulët të Gjilanit. Sipas dyshimeve të deritanishme, Valon Ramushi ka privuar nga jeta bashkëshorten e tij dhe vëllain e saj, duke shënuar kështu një vrasje të dyfishtë. Gjatë këtij sulmi të armatosur, i dyshuari ka plagosur rëndë edhe një person tjetër, që dyshohet të jetë kushëriri i viktimave. I lënduari po vazhdon trajtimin mjekësor në Repartin e Mjekimit Intensiv në Qendrën Klinike Universitare të Kosovës (QKUK). Pas kryerjes së krimit, autori i dyshuar është dorëzuar vetë në organet e rendit. Ndërkohë, Prokuroria Themelore në Gjilan ka nisur hetimet intensive për të ndriçuar plotësisht rrethanat dhe motivet që çuan në këtë ngjarje të rëndë. Një familjar i viktimave ka bërë të ditur se dyshimet e para lidhen me xhelozinë e bashkëshortit të ndjerë, duke shtuar se çifti nuk kishte pasur më parë konflikte të hapura familjare. Ai gjithashtu u shpreh se Egzoni ishte djali i vetëm i asaj familjeje. Ndërkaq, Gjykata Themelore në Gjilan ka marrë vendim që ndaj të dyshuarit Valon Ramushi të caktohet masa e paraburgimit prej një muaji.